इटहरी । नेपाल विद्यार्थी संघ जनता बहुमुखी क्याम्पस इकाइ समितिले सहिद दिवसको अवसरमा दीप प्रज्वलन गरेको छ । सोमबार साँझ इटहरी चोकमा दिप प्रज्वलन गरी सहिदप्रती सम्मान प्रकट गरेको हो ।
सहिद शुक्रराज शास्त्रीलाई विसं १९९७ माघ १० गते टेकुस्थित पचलीमा मृत्युदण्ड दिइएको थियो । सहिद धर्मभक्त माथेमालाई सिफलमा विसं १९९७ कै माघ १३ गते र गङ्गालाल श्रेष्ठ एवम् दशरथ चन्दलाई माघ १५ गते शोभाभगवतीमा मारिएको थियो ।
राणाशासनको विरोध गर्दै जनतालाई प्रजातन्त्रका पक्षमा एकजुट एवम् शिक्षित गरेको आरोपमा विसं १९९७ मा उहाँहरूलाई तत्कालीन राणा शासकले मृत्युदण्ड दिएको थियो ।
माघ १६ गते सहिद दिवसका दिन विभिन्न कार्यक्रमको आयोजना गरी मुलुक र जनताका लागि भएका अधिकारका आन्दोलनमा आफूलाई समर्पित गर्ने सम्पूर्ण सहिदको सम्झना गरिन्छ ।
इटहरीमा आयोजित कार्यक्रममा इटहरी उपमहानगरपालिकाका मेयर हेमकर्ण पौडेल, नेपाली काङ्रेस नगर सचिवद्वय मन्दिप भट्टराई, विक्रम घिमिरे जनता क्याम्पस व्यबस्थापन समिती सदस्य प्रमोद भट्टराई लगायतको उपस्थिती रहेको थियो ।
