विराटनगर । प्रदेश नं १ मा निर्वाचित नेपाली कांग्रेसका सांसदहरूले प्रदेश सभामा जिम्मेवार भएर काम गर्ने प्रतिबद्धता व्यक्त गरेका छन् । सोमबार प्रदेश सभा सदस्य पदको शपथ पछि आयोजित छलफल कार्यक्रममा उनीहरूले बदलिएको राजनीति परिवेशपछिको अवस्थालाई मध्यनजर गर्दे सदनमा एकताबद्ध भएर काम गर्ने बताएका हुन् ।
प्रदेशका आन्तरिक मामिला तथा कानूनमन्त्री केदार कार्की, सडक पूर्वाधार तथा सहरी विकाश मन्त्री हिमाल कार्की र निवर्तमान प्रदेश सभा सदस्य ओम प्रकाश सरावगीद्धारा आयोजित कार्यक्रममा बोल्दै केन्द्रीय सदस्य समेत रहेका अमृत अर्यालले सदनमा एकजुट भएर जनताका समस्या बुलन्द ढङ्गले उठाउनुपर्ने अवस्था आएको बताए । उनले भने, ‘अहिलेको परिस्थितिले हामीलाई पक्कै पनि निराश त बनाएकै छ, तर पनि हामीले सशक्त खबरदारी गर्नुको विकल्प पनि छैन । त्यस कारण हामीले एकताका साथ यो परिस्थितिमा जनमुखी भएर काम गर्नु पर्छ ।’
अर्का सांसद शमशेर राईले चुनावमा गठबन्धन गर्दाको परिणामबाटै कांग्रेस प्रतिपक्षमा बस्नुपर्ने अवस्था आएकाले यसको गम्भीर समीक्षा हुनुपर्ने बताए । कांग्रेसबाट प्रदेश १ बाट निर्वाचित सदस्यहरूलाई एक ठाउँमा जोड्ने उद्देश्यले निवर्तमान सांसदको अनुभवसहित कार्यक्रम आयोजना गरिएको मन्त्री केदार कार्कीले बताए । कार्यक्रममा प्रदेश सभामा निर्वाचित सबै सदस्यको उपस्थिति रहेको थियो ।
