विराटनगर । मोरङको निर्वाचन क्षेत्र नं ६ ‘ख’ का उम्मेदवार परशुराम बस्नेतको विगतको बारेमा जानकारी नहुनै कमै होलान् । सामान्य माइक्रो बसको खलासीबाट शुरु भएको बस्नेतको जीवन यात्रा यति बेला नेकपा एमालेको प्रदेश सभाको उम्मेदवारसम्म आइपुग्दा कहालीलाग्दो आपराधिक यात्रा तय गरिसकेका छन् ।
कुनै समयमा विराटनगर वडा नं ८ को भाडाको घरमा एउटा कोठामा बस्ने परशुराम एकाएक आलिसान भव्य महलमा बस्न सक्ने हैसियतमा पुगेका छन् । धरान बसपार्कमा माइक्रोको टिकटमा दलाली गर्ने बस्नेतको आपराधिक यात्राको चर्चा तत्कालीन नागरिक दैनिकका विराटनगर संवाददाता खिलानाथ ढकाललाई आक्रमण गरेपछि चुलिएको हो ।
बस्नेतको गुण्डागर्दी र आपराधिक श्रृखंलाको बारेमा समाचार लेखेको भन्दै बस्नेतका गुण्डा समूहका रोहित कोइरालाले ज्यान मार्ने उद्देश्यले आक्रमण गरेपछि बस्नेत फरार भएका थिए । तत्कालीन नेकपा एमालेको भातृ सङ्गठन युथ फोर्सका अध्यक्ष महेश बस्नेतको संरक्षणले पक्राउ पर्न नसकेका बस्नेतको अपराधमा नेकपा एमालेले प्रशस्तै मलजल गरेको थियो । एमालेको संरक्षण पाएपछि हौसिएका बस्नेतले त्यसपछि विराटनगरमा जबरजस्ती टेण्डर कब्जा, अपहरण र फिरौती, घर कब्जा र मिटर ब्याज जस्ता आपराधिक कार्यहरूको श्रृखंला नै शुरु गरे ।
आपराधिक पृष्ठभूमिका बस्नेतलाई नेकपा एमालेले प्रदेश सभामा उम्मेदवार बनाएपछि यति बेला पार्टीको ठुलो पङ्क्ति निर्वाचनमा सहभागी नहुने भन्दै बाहिर रहेको छ । लामो समय पार्टीमा रहेर काम गरेका योग्य कार्यकर्तालाई टिकट नदिएर अपराधका मसिहा बस्नेतलाई उम्मेदवार बनाएपछि पार्टीको जिल्ला कमिटीबाट राजीनामा दिनेको लर्को लागेको थियो ।
पार्टीका जिल्ला सचिव समेत रहेका रुपेश खतिवडा लगायतको ठुलो कार्यकर्ता पङ्क्तिले बस्नेतको उम्मेदवारीमा असहमति जनाउँदै राजीनामा दिएका छन् ।
बस्नेतको पारिवारिक जीवनमा समेत आपराधिक कार्यको असर देखिएको छ । बहु विवाहको समेत मुद्दा खेपेका बस्नेतको अपराध कर्मसँग असन्तुष्ट रहेकी कान्छी श्रीमतीले समेत पारपाचुके गरेकी छिन । पारपाचुके मुद्दामा श्रीमतीलाई अंश समेत नदिई लखेटेका बस्नेतको सम्पत्ति शुद्धीकरण आयोगमा मुद्दा समेत खेपेका थिए ।
विराटनगरमा अपराधको जग बसाउने बस्नेतको उम्मेदवारीले नेकपा एमालेमा मात्र नभएर सिङ्गो महानगर नै आश्चर्यमा रहेको छ । राजनीतिको नाममा अपराध कर्ममा संलग्न बस्नेत जस्ता मानिसहरू नै उम्मेदवार बनेपछि मुलुकबाट नै राजनीतिप्रति वितृष्णा बढ्दै जाने निश्चित छ ।
