इटहरी। नेकपा एमालेकी केन्द्रीय सदस्य तथा प्रतिनिधि सभा उम्मेदवार भगवती चौधरीले आफु कहिल्लै भ्रष्टाचार नगर्ने बताएकी छिन् । सुनसरीको इटहरीमा प्राइमटाइम टेलिभिजनले आयोजना गरेको चुनाबी वहस कार्यक्रममा बोल्दै नेतृ चौधरीले आफु हरेक कुराले सक्षम र आत्मनिर्भर रहेकाले भ्रष्टाचार नगर्ने बताइन् ।
सुनसरी ३ नं क्षेत्रको विकास र समृद्धिको लागि राजनीतिमा होमिएको बताउँदै चौधरीले सुनसरी क्षेत्रका सबै प्रकारका समस्याहरु हल गरी विकासको लहर ल्याउन आफु सक्रिय हुने बताइन् । ‘मलाई भ्रष्टाचार गर्नुछैन, म आफैं सक्षम छु । पढेलेखेकी छु । राजनीति गरेर कमाउँछु भन्ने सोच मसँग छैन । खानकै लागि, कमाउनकै लागि राजनीति गरेर भ्रष्टाचार गर्दिन’ नेतृ चौधरीले भनिन् ।
बहसमा सहभागी हुँदै उनले ३० वर्षदेखि शासन सत्तामा रहेकाले कुनै पनि विकासका कामहरु नगरेको प्रसंग निकाल्दै दुहवी, गढी, बर्जु तथा इटहरीका क्षेत्रहरुको विकासमा ठोस योजनाहरु बनाएको पनि बताइन् । म भिजन बोकेको महिला हुँ, महिला सशक्तिकरण, आर्थिक पहुँच, युवा स्वरोजगार, निर्यातमुखी कृषि प्रणाली र सुनसरी जिल्लाका पर्यटकीय गन्तव्य क्षेत्रहरुको विकास गरी शिक्षित र समुन्नत क्षेत्रका रुपमा विकास गर्न सक्छु ।’ चौधरीले भनिन् ।
आफुले २० वर्षदेखि सामाजिक कामहरु गरेकोले आफ्नो क्षेत्रमा कुन स्थानमा के समस्या छ त्यो पनि अध्ययन गरेको बताइन् । ०४८ सालदेखि निरन्तर चुनाब जितेर गएपनि प्रतिपक्षी उम्मेदवारले जनताका लागि केही नगरेकोले अब परिवर्तनकै लागि पनि आफुलाई जिताउने दावी गरिन् । चौधरीले आफु राज्यमा नभएपनि आफ्नो क्षेत्रको विकासका लागि धेरै काम गरेको बताइन् । ‘म राज्यमा नभएपनि मेरो पार्टीको सरकार हुँदा होस् वा नहुँदा केन्द्र, संघीय सरकारसँग लविङ गरेर विभिन्न विकासका लागि बजेटहरु ल्याएकी छु । कोरोना संक्रमणमा स्थानीय तहहरुसँग सहकार्य गरेर डेढ करोड बढीको राहत वितरण गरेको, व्यक्तिगत रुपमा फिल्डमै गएको समेत बताइन् ।
चौधरीले इटहरीमा रहेको बसपार्क व्यवस्थापन गर्न अघिल्लो निर्वाचनमै आफुले अध्ययन गरेको र व्यवस्थित बसपार्क बनाउन डिजिटलाइजेसन गर्ने, अन्तराष्ट्रिय स्तरको बनाउन लागि पर्ने बताइन् ।
साथै, चौधरीले दुहवीको मुख्य सडक विस्तार र निर्माणमा पनि आफुले सक्दो लविङ गरेको भन्दै विकास र जनताका सवालमा आफु सदैव लागि पर्ने प्रतिबद्धता जनाइन् ।
विजयकुमार गच्छदार आउन सकेनन् ।
कार्यक्रममा नेपाली कांग्रेसबाट उम्मेदवार विजयकुमार गच्छदार आएनन् । ललिता निवास जग्गा प्रकरणमा मुछिएका गच्छदार जनताको जवाफ दिनुपर्छ भनेर कार्यक्रममै सहभागी भएनन् । कार्यक्रम सञ्चालक ऋषि धमलाले गच्छदार केही बेरमै आइपुग्ने उद्घोष गरेपनि उनी आएनन् । पछि सहभागीहरुले गच्छदारलाई किन नबोलाएको भन्दै प्रश्न गर्दा बारम्बार बोलाएपनि नआएको भन्ने जवाफ दिएका थिए ।
गच्छदार ललिता निवास सरकारी जग्गा प्रकरणमा निलम्बित सांसद हुन् । गच्छदार सहित १७५ जना विरुद्ध अख्तियार दुरुपयोग अनुसन्धान आयोगले सरकारी जग्गा व्यक्तिको नाममा नामासारी गरेको अभियोगमा विशेष अदालतमा मुद्दा दायर गरेको छ । उक्त प्रकरणमा डेढ वर्षदेखि फरार गच्छदार शेरबहादुर देउवा प्रधानमन्त्री भएको भोली पल्टै विशेष अदालतमा हाजिर भएर १० लाख धरौटीमा रिहा भएका थिए ।
