इटहरी । सत्ता गठबन्धनमा नेपाली काँग्रेस प्रदेशमा एक सिटमा खुम्चिएपछि खोटाङ काँग्रेसले विद्रोहको चेतावनी दिएको छ । शनिवार सभापति शेरबहादुर देउवा तथा गठबन्धन दलका नेतालाई पत्र पठाउँदै नेताहरूले खोटाङ कांग्रेसजनमा निराशा छाएको बताएका छन् ।
‘जिल्लाको वस्तुगत यथार्थ तथा संगठानिक अवस्थाको गहिरो विश्लेषण नगरी गरिएको निर्णयले खोटाङ काँग्रेसलाई गम्भीर आघात पु¥याएको छ । गठबन्धनको उद्देश्य नेताको व्यवस्थापन मात्र नभएर सिंगो पार्टी कार्यकर्ता र जनताको भावनाको समेत व्यवस्थापन हो । यसरी कार्यकर्ता र जनभावना विपरीत गरिएको निर्णयले पार्टीमा गम्भीर क्षति हुने देखिन्छ,’ पत्रमा भनिएको छ ।
पूर्व सांसद तथा पूर्व मन्त्री सर्वधन राई, जिल्ला सभापति विष्णुकुमार राई, पूर्व सभापतिहरू नरेश कुमार श्रेष्ठ र सुवास कुमार पोखरेल, उप सभापति इवन राई, प्रदेश सदस्य जितेन्द्र सिंह ठकुरी लगायत विभिन्न भातृ संस्थाका प्रतिनिधि सहित २० जनाले पत्रमा हस्ताक्षर गरेका छन् ।
काँग्रेस सभापति विष्णुकुमार राई फलैंचाकर्मी खेमराज सापकोटासँग भन्छन् ‘खोटाङ काँग्रेसलाई अन्याय भएको छ । कार्यकर्ता र जनतालाई रुवाएर हाम्रो पार्टीको २६ हजार भोट ९ सय भोट भएको कुनै पनि पार्टीलाई हाल्न सक्दैन । अन्यायको विरुद्धमा कांग्रेस जिल्लामा एकजुट छ । हामी जिल्लामै निर्णय गरेर गठबन्धनको विरुद्धमा उमेद्धारि दिन्छ । गठबन्धन पनि जोगाउने गरी सकारात्मक समाचार सुन्ने भए नेतृत्वले तुरुन्त निर्णय सच्यायोस् ।’
प्रतिनिधिसभामा माओवादी केन्द्र साथै प्रदेशसभामा एकमात्र नेपाली काँग्रेस र एक नेकपा एकीकृत समाजवादीको भागमा परेपछि जिल्लामा असन्तुष्टि चुलिएको हो । काँग्रेस खोटाङले कि प्रतिनिधि सभा कि प्रदेशका दुवै क्षेत्रमा आफूहरूको उमेद्वारी हुनुपर्ने माग गरेको छ ।
काँग्रेस नेतृत्वले जिल्लामा निर्णय नसच्याए प्रतिनिधिसभा पूर्व राज्यमन्त्री सर्बधन राई र प्रदेश क मा पूर्व जिल्ला सभापति सुवासकुमार पोखरेल र ख मा पार्टी जिल्ला सभापति विष्णुकुमार राई जिल्लाकै निर्णय अनुसार उमेद्धारि मनोनयन गर्ने तयारीमा रहेका छन् ।
