काठमाडौं । चलचित्र ‘दुई नम्बरी’ले सिड्नीको यात्रा तय गरेको छ । दिपेन्द्र लामाको निर्देशन रहेको यो चलचित्रलाई सिड्नीको प्रदर्शनको जिम्मा पाएका फन्टाष्टिक ऐभेन्टका गगन शर्माका अनुसार चलचित्र ‘दुई नम्बरी’ अक्टोबर ७ तारेखका दिनदेखी सिड्नीमा प्रदर्शन हुने भएको छ ।
‘ यो चलचित्रको माग सिड्नीमा राम्रै भएका कारण म यो चलचित्रसंग जोडिएको हुँ। नेपालीहरूको महान चाड दशैको अबसर पारेर प्रदर्शनमा आउँन लागेको यो चलचित्र हामी पुरा सिड्नी र नेपाल एकसाथ रिलिज गर्दै छौं ‘ शर्माले भने ।
सिड्नीमा यस अघि प्रदर्शनमा आएको चलचित्र कबड्डी-४ ले कमाएको सफलता र लोकप्रियतासंगै दयाहाङ राई र सौगात मल्लले एकसाथ काम गरेको यो अर्को चलचित्र हो ।
पछिल्लो समय दयाहांग राई र सौगात मल्लको जोडी भएको चलचित्रले सफलता हात पारिरहेको समयमा आउँन लागेको चलचित्र दुई नम्बरीमा दया र सौगातसंगै उपासना सिंह ठकुरी, उगेन छोदेन लगायतका कलाकारहरूको अभिनय रहेको छ ।
