धरान । २३ औँ बुढासुब्बा टुबोर्ग गोल्डकप प्रतियोगिता आगामी चैत २६ गते देखि हुने भएको छ।
बुधबार आयोजक धरान फुटबल क्लबले पत्रकार सम्मेलन गर्दै आगामी चैत २६ गतेदेखि वैशाख ३ गतेसम्म आयोजना गर्ने जानकारी दिएको हो । धरानको बुढासुब्बा रङ्गशालामा हुने प्रतियोगितामा आयोजक सहित ८ वटा टिमले सहभागिता जनाउने क्लबका अध्यक्ष किशोर राईले पत्रकार सम्मेलनमा जानकारी दिए ।
प्रतियोगिताको विजेताले नगद ट्रफीसँगै नगद १० लाख र उपविजेताले नगद ५ लाख हात पार्नेछन् । प्रतियोगिताको उत्कृष्ट खेलाडीले १ लाख ५० हजार पाउनेछन् भने प्रत्येक खेलको म्यान अफ दि म्याचले १० हजार नगद पुरस्कार पाउनेछन् ।
प्रतियोगिताको सर्वाधिक गोलकर्ताले नगद २० हजार पाउनेछन् भने उत्कृष्ट डिफेन्स, उत्कृष्ट गोलकिपर, उत्कृष्ट मिडफिल्ड, उत्कृष्ट स्ट्राइकर र उत्कृष्ट प्रशिक्षकले जनही नगद १५ हजार पुरस्कार पाउने छन् ।
हालै सम्पन्न भएको सहिद स्मारक लिगको उत्कृष्ट ३ वटा टिम, धरान फुटबल क्लब धरान, भारतका २ वटा क्लब र मोफसलको अन्य २ उत्कृष्ट क्लब गरी जम्मा ८ वटा क्लबले प्रतियोगितामा सहभागी हुने आयोजकले जानकारी दिइएको छ ।
