लेटाङ । मोरङको लेटाङ- ८ की ११ वर्षीया करुणा राईको करणी गरि हत्यामा संलग्नलाई कार्वाहीको माग गर्दै विद्यार्थीहरुले प्रदर्शन गरेका छन् ।
आइतबार करुणा अध्ययन गर्ने जाँते माध्यमिक विद्यालय परिसरबाट प्ले कार्डसहित प्रदर्शनमा उत्रिएका विद्यार्थीहरुले लेटाङ बजारमा पुगेर नाराजुलुस गर्दै दोषिलाई कडा भन्दा कडा कारर्वाही माग गरेका हुन् । पदर्शनमा निस्किएका विद्यार्थीहरुले ईलाका प्रहरी कार्यालय लेटाङ, लेटाङ नगरपालिकाको कार्यालय र स्थानीय वीपी चौकमा दोषीलाई कडा कारवाही गर्न माग गर्दै प्रदर्शन गरेका छन् ।
सयौंको संख्यामा सहभागी भएका विद्यार्थीहरुले दोषीलाई कडा कारवाही गर्नुपर्ने, ज्यामिरे क्षेत्रका विद्यार्थीलाई आवत जावत गर्न गाडीको व्यवस्था गर्नुपर्ने, मृतकको परिवारलाई उचित क्षतिपूर्ति दिनुपर्ने, ज्यामीरे क्षेत्रमै कक्षा ८ सम्मको पठनपाठन सञ्चालन हुनेपर्ने, जाँते माविमा छात्राबास सञ्चालन गर्नुपर्ने र ज्यामिरे क्षेत्रमा अस्थायी प्रहरी चौकी स्थापना गर्नुपर्ने लगायतका माग राखेका छन् ।
प्रदर्शन पश्चात नगरपालिकामा भएको छलफलमा नगरपालिकाले दोषीलाई कडा भन्दा कडा सजाय दिलाउन सम्बन्धित निकायलाई खवरदारी गर्ने, विद्यालय आवतजावत गर्नका लागि तत्काल सवारी साधन उपलब्ध गराउने, मृतकको परिवारलाई उचित क्षतिपूर्ति दिने लगायतका विषयमा सहमति गरेको छ । यस्तै ज्यामीरे क्षेत्रमै कक्षा ८ सम्मको पठनपाठन सञ्चालन गर्न, जाँते माविमा छात्राबास सञ्चालन गर्न र ज्यामिरे क्षेत्रमा अस्थायी प्रहरी चौकी स्थापनाका लागि समेत पहल गर्ने प्रतिवद्धता जनाएको छ ।
गत बुधबारदेखि हराइरहेकी करुणाको शव स्थानीय सामुदायिक वनको जंगलमा खाल्डो खनेर गाडिएको अवस्थामा शुक्रबार विहान भेटिएको थियो । प्रहरीले घटनामा संलग्न भएको आरपोमा स्थानीय ६४ वर्षीय दीपक गिरीलाई पक्राउ गरि सार्वजनिक गरिसकेको छ । गीरिले आफुले करणी पश्चात बालिकाको हत्या गरेको स्विकार गरेको प्रहरीले जनाएको छ ।
