विराटनगर । सप्तकोसी डेभलपमेन्ट बैंकमा करोडौं रकम हिनामिना गरेको आरोपमा तत्कालीन बैंकका सीईओ नवीन सुवेदीसहित तीन जना कर्मचारीलाई उच्च अदालत विराटनगरले पुर्पक्षका लागि थुनामा राख्ने आदेश दिएको छ ।
शुक्रबार उच्च अदाल विराटनगरले बैंकका सीईओ नवीन सुवेदीसहित तीन जना कर्मचारीलाई उच्च अदालत विराटनगरले पुर्पक्षका लागि थुनामा राख्ने आदेश दिएको हो ।
त्यस्तै बैंकका एक कर्मचारीलाई भने दुई लाख धरौटीमा रिहा गर्ने आदेश दिइएको छ । उच्च अदालत विराटनगरका मुख्य न्यायाधीश तीलप्रसाद श्रेष्ठ र न्यायाधीश मुरारीबावु श्रेष्ठको संयुक्त वाणिज्य इजालसले विराटनगर ६ घर भएका सीईओ सुवेदी, बैंकका जनरल सर्भिस डिपार्टमेन्ट प्रमुख विराटनगर १ का हिमाल भट्टराई र वित्तीय प्रमुख देवीप्रसाद भण्डारीलाई पुर्पक्षका लागि थुनामा राख्ने आदेश दिएको छ ।
बैंकका अपरेसनल प्रमुख अमित थापा मगरलाई दुई लाख रुपैयाँ धरौटी लिएर छोड्ने आदेश भएको उच्च अदालतका सूचना अधिकारी ओम सुवेदीले जानकारी दिए । पक्राउ परेका चारै जनाको बिहीबार बयान सकिएपछि शुक्रबार थुनछेक बहस भएको थियो ।
आदेशपछि पूर्व सीईओ सुवेदी, जनरल सर्भिस डिपार्टमेन्ट प्रमुख भट्टराई र वित्तीय प्रमुख भण्डारीलाई पुर्पक्षका लागि थुनामा मोरङ कारागार पठाइएको र मगरले धरौटी बुझाएपछि रिहा भएको उनले बताए । उनीहरुसँगै पक्राउ परेको बैंकका कर्मचारी हामेप्रसाद पौडेललाई कोरोना संक्रमण भएकाले निको भएपछि उनको बयान गराएर थुनछेक बहस हुने सूचना अधिकारी सुवेदीले जानकारी दिए ।
जिल्ला सरकारी वकिलको कार्यालय मोरङले ‘बैंकिङ कसुर’ मुद्दामा सुवेदीसहित ९ जना बैंकका कर्मचारी र तीन जना खाताबालालाई प्रतिवादी बनाएर मुद्दा दर्ता गराएको थियो । जिल्ला सरकारी वकिलको कार्यालयले बैंकको हिनामिना भएको १५ करोड ७५ लाख र ५ सय ७५ रुपैयाँ र सोही बराबरको जरिबाना तथा ६ वर्षदेखि ८ वर्षसम्म कैद सजायको माग दाबीसहित मुद्दा १२ जनाविरुद्ध दर्ता गराएको हो ।
सरकारी वकिलको कार्यालयले सीईओ सुवेदी, बैंकका जनरल सर्भिस डिपार्टमेन्ट प्रमुख भट्टराई, वित्तीय प्रमुख भण्डारी, अपरेसनल प्रमुख मगर, पौडेलविरुद्ध मुद्दा दर्ता गराएको छ । बैंकका कार्यालय सहयोगी चूडाबहादुर निरौला, बैंकका कार्यालय सहायक पदबाट राजीनामा दिएका निश्चल सुवेदी, बैंकको कनिष्ठ सहायक पदबाट राजीनामा दिएकी समीक्षा अधिकारी, वरिष्ठ सहायक शुभेच्छा निरौलाविरुद्ध मुद्दा दर्ता गराइएको हो । खातावाला बबिता बस्नेत, कमल दाहाल र मनोज भट्टराईविरुद्ध मंगलबार मुद्दा दर्ता भएको थियो । उनीहरु ७ जना फरार छन् ।
विराटनगर महानगरपालिका ७ स्थित सप्तकोसी डेभलपमेन्ट बैंकको कर्पोरेट कार्यालयबाट १५ करोड ७५ लाख ४० हजार ५७५ रूपैयाँ हिनामिना भएको अनुसन्धानबाट खुलेपछि प्रहरी ५ जनालाई पक्राउ गरेर मुद्दा दर्ताका लागि सरकारी वकिलको कार्यालयमा फाइल बुझाएको थियो ।
सीईओ सुवेदीले बैंकमा परिवारका सदस्यहरुको सञ्जाल बनाएर बैंकको मुनाफा रकम रेमिटेन्सबाट आएको देखाएर हिनामिना गर्दै आएका थिए । काबेली विकास बैंक धनकुटा र सप्तकोसी डेभलपमेन्ट विकास बैंक मोरङ २०५७ जेठ २२ गते गाभिएपछि केन्द्रीय कार्यालय धनकुटामा राखेर सप्तकोसी डेभलपमेन्ट विकास बैंकको नामबाट वित्तीय कारोबार गर्दै आएको छ ।
