रामधुनी। १७ वर्षीय किशोरीमाथि बलात्कार गरेको भन्दै तनहुँ प्रहरीमा किटानी जाहेरी दर्ता भएपछि अभिनेता पल शाह सम्पर्क बिहिन भएका छन्। कास्की घर भएका किशोरीका बुबाले आफ्नी छोरीमाथि पटकपटक पलले बलात्कार गरेको भन्दै जाहेरी दिएपछि उनी मोबाइल अफ गरेर सम्पर्कबिहिन बनेका हुन् ।
तर सामाजिक सञ्जालमा सक्रिय छन्। पलले बुधबार फेसबुकमार्फत केही अडियो सार्वजनिक गरेका छन्। सो अडियोमा उनले दुर्गेश थापा, सरोज ओलीलगायतकाले फसाएको दाबी गरेका छन्।
बिहीबार पल शाह बालुवाटार त कहिले पुतलीसडकमा गएको उनको मोबाइल लोकेसनले देखाएको प्रहरीले जनाएको छ। तर एक छिनमा मोबाइल अफ भएको प्रहरीले जनाएको छ। पलको खोजीमा प्रहरीको केन्द्रीय अनुसन्धान ब्युरो, महानगरीय अपराध महाशाखा, काठमाडौँ र ललितपुर परिसरको टोली खटिएको छ। पलले काठमाडौँ छाडि नसकेको प्रहरीको निष्कर्ष छ। पल शाहलाई भने सिधै अदालतमा गएर हाजिर हुन शुभचिन्तकहरूले सुझाव समेत दिएका छन्।
