भेडेटार । अंग्रेजी नयाँ बर्ष २०२२ अवशरमा आन्तरिक तथा बाह्य पर्यटकहरुलाई भित्राउने उद्देश्यले संचालन गरिएको नवौं भेडेटार फुड फेस्टिवल सम्पन्न भएको छ ।
सुनसरी र धनकुटाको सिमानामा अवस्थित प्रदेश १ को प्रमुख पर्यटकीय गन्तव्यको रुपमा चिनिने भेडेटारमा शुक्रबारदेखि सुरु भएको फुड फेस्टिवल आइतबार सम्पन्न भएको हो । आइतबार आयोजक होटल एशोसिएसन भडेटारले एक कार्यक्रमका विच फेस्टिवलको सम्पन्न गरेको हो ।
शुक्रबार प्रदेश १ का भौतिक पुर्वाधार विकास मन्त्री हिमाल कार्कीले उद्घाटन गरेको फेस्टिवलको साँगुरीगढी गाउँपालिकाका अध्यक्ष कुमार जंग याखाले समापन गरे । उनले प्रदेश १ को भेडेटार प्राकृतिक सौन्दर्य, धार्मिक पर्यटनको दृष्टिकोणले पनि प्रचुर सम्भावना बोकेको भएकाले देश तथा विदेशका पर्यटकहरु सजिलै भेडेटार आउने गरेको बताए ।
कोरोनाले थला परेको पर्यटनलाई माथि उठाउन निजी क्षेत्रले गरेको कार्यको प्रशंसा गर्दै अध्यक्ष याखाले सरकारले सहयोग गर्नुपर्ने बताए ।
त्यस्तै समापन कार्यक्रममा बोल्दै होटल एशोसिएशन भेडेटारका अध्यक्ष जितेन्द्र रुम्दालीले प्रयेक वर्ष फुड फेस्टिवलको आयोजना गर्दै आएकोमा यस वर्ष पनि अंग्रेजी नयाँ वर्षको अवशरमा ९औं भेडेटार फुड फेस्टिवल गरेको बताए । फेस्टिवल अवधिभर भेडेटारका होटल र लजहरुले १० प्रतिशत छुट दिएको बताए देवीथान जिपलाइनमा ३ वटै क्याटोगोरीमा १५ प्रतिशत छुट र प्याराग्लाइडिङमा पनि फेस्टिवल अवधिभर पर्यटकहरुले ३० प्रतिशत छुट दिइएको उनले जानकारी दिए ।
