सुन्दरहरैंचा । मोरङको सुन्दरहरैंचा ६ स्थित खर्सांगेनीमा सांगीतिक कार्यक्रम हुने भएको छ । सिद्धार्थ युवा क्लवको आयोजनामा यही कात्र्तीक २९ गते सिद्धार्थ सांगीतिक कार्यक्रम हुने भएको आयोजकले शुक्रबार पत्रकार सम्मेलन गरि जानकारी दिएको हो ।
राष्ट्रिय स्तरका कलाकारहरुको सहभागितामा तिहार छठ लगायतका पर्वहरुको अवसर पारेर स्थानीयबासीलाई विशृद्ध मनोरञ्जन प्रदान गर्ने उद्देश्यले कार्यक्रम आयोजना गरेको कार्यक्रम संयोजक डम्बर थापा मगरले जानकारी दिए । बिहान ११ बजेदेखि सुरु हुने कार्यक्रममा अपरान्ह ४ बजेसम्म खुल्ला नृत्य प्रतियोगिता सञ्चालन हुने छ । नेपाली लोक सँस्कृति झल्कने गीतमा सामुहीक नृत्यहरुबीच प्रतिस्पर्धा गराइने जनाइएको छ ।
यसैगरि साँझ ६ बजेदेखि हुने साँस्कृतिक कार्यक्रममा चर्चित हाँस्य श्रृंखला सक्किगोनीका मुख्य पात्रहरु अर्जुन घिमिरे पाँडे, कुमार कट्टेल जीग्रिको हाँस्य प्रस्तुती र चर्चित गायिका एलिना चौहानको प्रस्तुती रहने आयोजकले जानकारी दिएको छ ।
कार्यक्रममा स्थानीय कलाकारहरुको गीत तथा नृत्यहरुको प्रस्तुति समेत रहने जनाइएको छ । वर्षेनी कार्यक्रम आयोजना गर्ने गरेकोमा कोरोना महामारीका कारण निकै लामो समय यस्ता कार्यक्रमहरु सञ्चालन नभएको अवस्थामा मनोरञ्जन दिलाउने उद्देश्यले कार्यक्रम आयोजना गरिएको मगरले बताए ।
कार्यक्रममा ८ लाख खर्च हुने र सो रकम स्थानीयबासी स्वयम्ले स्वतस्फूर्तरुपमा संकलन गरेको आयोजकले जनाएको छ । कार्यक्रममा सुन्दरहरैंचा, इटहरी, केराबारी लगायत क्षेत्रका गरि ७ हजार भन्दा बढी दर्शकको सहभागित हुने आयोजकको अपेक्षा छ ।
कार्यक्रममा विराट टेलिभिजन इटहरी र कोशी बुलेटिन डटकम मिडिया पार्टनरको रुपमा रहेका छन् । आयोजकले आउने दर्शकलाई प्रवेश निःशुल्क भनेको छ ।
