रामधुनी । नेपालको चिकित्सा क्षेत्रमा आधुनिक प्रविधिको प्रयोग गरेर बिरामीहरुको स्वास्थ्य जाँच तथा उपचार हुने गरेको छ ।
तर स्वास्थ्य सेवा लिनका लागि भने बिरामीहरुमाझ सरल प्रक्रिया अझै उपलब्ध हुन सकेको छैन । डाक्टरहरु आए नआएको फोन गरेर बुझिरहनुपर्ने, लामो लाइन बसेर बिल काट्नुपर्ने, सामान्य फलोअपका लागि पनि डाक्टरकहाँ गइरहनुपर्ने जस्ता झन्झट अझै रहेको छ ।
तर यी सबै झन्झट र समस्याहरु समाधान गर्ने गरी क्युरा हेल्थ नामक एप सार्वजनिक भएको छ । स्वास्थ्य सेवालाई स्मार्ट बनाउने उद्येश्यका साथ नेपालमा पहिलो पटक यो एप प्रयोगमा ल्याइएको हो ।
यो एप भित्र विभिन्न अस्पतालहरुमा उपलब्ध डाक्टरहरुको विवरण, सेवा उपलब्ध हुने समयहरुको बारेमा जानकारी लिन सकिने मात्र होइन, उनीहरुसँग भिडियो कलमार्फत् स्वास्थ्य परामर्शसमेत लिने सुविधा समेत रहेको छ। अस्पतालहरु पर्याप्त भए पनि बिरामीहरु अलमल्ल परिरहेको अवस्थालाई सहजिकरण गर्न विभिन्न सुविधासहितको एप संचालनमा ल्याइएको क्युरा हेल्थका मेनेजर सुमन मंग्रातीले जानकारी दिए । उनका अनुसार एपमा दिइएका नम्बरमा फोन गरेर पनि सेवा लिन सकिने छ ।
विराटनगरबाट सेवा दिन सुरु गरेको यो एपबाट अब इटहरीका बिरामीहरुले समेत सुविधा लिन पाउनेछन् । इटहरीमा रहेका विभिन्न अस्पताल, मेडिकलहलदेखि विराटनगरका अस्पतालहरुमा अनलाइनमार्फत पुर्जा लिन सकिन्छ ।
यस्तै ल्याब सुविधा पनि एपमार्फत लिन सकिन्छ । इटहरी तथा विराटनगरका ए तथा बी ग्रेडका ल्याबहरुबाट घरमै बसी बसी रगत जाँच गर्न मिल्ने सुविधासमेत एपमा छ । ल्याब टेक्निसियन घरमै पुगेर रगत संकलन गरि रिपोर्ट दिने सुविधासमेत रहेको मग्रातीले जानकार दिए ।
एपले दशैं, तिहारको अवसरमा विभिन्न स्वास्थ्य सेवामा विशेष छुट अफरसमेत ल्याएको छ । जसमा थाइराइड टेस्ट ८०० रुपैया, लिपिड प्रोफाइल ९ सय रुपैया, बेसिक होल बडी प्याकेज ३ हजार पाँच सय रुपैया, प्रिमियम होल बडी प्याकेज ५ हजार पाँच सय रुपैयामा उपलब्ध गराएको छ । यो एप प्ले स्टोर र एप्पल स्टोर दुवैमा उपलब्ध छ ।
