रामधुनी । सुनसरीको राम धुनी नगरपालिका वडा नम्बर ७ मा रहेको भुल्के कृषक समूहकी अध्यक्ष सोम कुमारी सुनुवार राइले कृषककालागी आएको क्षतिपूर्ति रकममा अनियमितता गरेको स्थानीय कृषकहरूले आरोप लगाएका छन् ।
गत वर्षको चैत्र महिना नगरपालिकाले कृषककालागी ५० प्रतिशत अनुदानमा उपलब्ध गराएको बर्खे धानको बिउ नउम्रिएपछि कृषकहरूले विरोध जनाएका थिए । कृषकले विरोध जनाएपछि नगरपालिकाले क्षतिपूर्ति बापत भुल्के कृषक समूहलाई उपलब्ध गराएको रकममा अनियमितता गरेको भन्दै स्थानीय कृषकहरू विरोधमा उत्रिएका हुन् ।
समूहकी अध्यक्षले कृषककालागी आएको १ लाख १ हजार रकमबाट कृषकले खरिद गरेको रकम प्रतिकेजी २५ रुपैयाँका दरले घरघरमा आफूहरूलाई थाहा नदिई पु¥याएको र रकम बुझिएको भनी हस्ताक्षर समेत नगराएको आरोप लगाएका छन् । भुल्के कृषक समूहकी अध्यक्षले कृषककालागी नगरपालिकाले उपलब्ध गराएको ५ सय ५ केजी धानको बिउकोको क्षतिपूर्ति रकम १ लाख १ हजारबाट १२ हजार ६ सय २५ रुपियाँ कृषकहरुलाई दिएर ८८ हजार ३ सय ७५ रुपैयाँ हिनामिना गरेको कृषकहरूले आरोप लगाएका छन् ।
अन्य कृषक समूहका सदस्यहरूले भने प्रतिकेजी २ सयका दरले आफूले क्षतिपूर्ति रकम पाएको भनेपछि आफूलाई थाहा भएको पूर्व अध्यक्ष हेम प्रसाद लिम्बुले बताए । कृषकालागी आएको सेवा सुविधामाथि यसरी कृषक समूहकी अध्यक्षले नै अनियमितता गर्दा आफूहरूलाई दुख लागेको लिम्बुले बताए ।
अन्य समूहले कृषकका लागी क्षतिपूर्ति रकम प्रतिकेजी २ सयका दरले वितरण गरेको तर भुल्के समूहले भने अरू मान्छे प्रयोग गरेर घरघरमा कृषकले खरिद गरेको रकम प्रतिकेजी २५ का दरले उपलब्ध गराए आफूहरूलाई चित्त नबुझेको उनले बताए । आफ्नो कार्यकालमा यस्तो कार्य नभएको उनले बताए ।
यता नेपाली काँग्रेस रामधुनी ७ का वडा सभापति जग बहादुर राईले भुल्के कृषक समूहकी अध्यक्षले अनियमितता गरेको आरोप लगाएका छन् । कृषकले खरिद गरेको रकम प्रतिकेजी २५ का दरले भुल्के कृषक समूहकी अध्यक्ष सोम कुमारी सुनुवार राईले केटाकेटीको प्रयोग गरेर रकम पु¥याउने काम गरेको भन्दै लिम्बुले आपत्ति जनाए ।
साना किसान बक्लौरीका सञ्चालक समितिका सदस्य गणेश बहादुर अधिकारीले भुल्के कृषक समूहकी अध्यक्षले कृषककालागी आएको रकममा अनियमितता गरेको आरोप लगाएका छन् । उनले साना किसानले पनि नगरपालिकाले उपलब्ध गराएको धानको बिउ नउम्रिएपछि नगरपालिकालाई जानकारी गराएको र सबै समूहलाई नगरपालिकाले प्रतिकेजी २ सयका दरले उपलब्ध गराएको जानकारी दिए । साना किसानले आफ्ना समूहका कृषकहरूलाई २ सय प्रतिकेजीका दरले वितरण गरिसकेको जानकारी दिए ।
यस विषयमा भुल्के कृषक समूहकी अध्यक्ष सोमकुमारी सुनुवार राईले फलैचान्यूज सँग टेलिफोन सम्पर्कमा आफूले कृषकालागी प्रतिकेजी २५ का दरले वितरण गरेको बताइन् । उनले बाँकी १ सय ७५ रुपियाँ प्रतिकेजी आगामी भदौ २ गते समूहको बैठक बसेर वितरण गर्ने जानकारी दिइन् ।
यस विषयमा कृषक समूहका सचिव मिलन लिम्बुले बिउ आएको भन्ने सुनेको तर आफूले नदेखेको बताए । सबै अध्यक्षले आफै नै वितरण गरेको बताए । आफूलाई क्षतिपूर्ति आएको भन्ने विषयमा अध्यक्षले जानकारी दिएको तर कति हो भन्ने नभनेको उनले बताए ।
उनले अध्यक्षले आफूलाई खाली चेकमा हस्ताक्षर गर्न लगाएको र कृषकका लागि बिउ तथा रकम वितरण गर्दा आफूलाई थाहा नदिएको बताए । बैठक नबसी अध्यक्षले आफै काम गर्ने गरेको उनले बताए ।
