इटहरी । नेपाल पत्रकार महासंघ सुनसरीले इटहरीमा कार्यक्षेत्र बनाएर काम गर्दै गरेका संचारकर्मीलाई लेखनवृत्ति वापतको रकम वितरण गरेको छ । आइतबार एक कार्यक्रमको आयोजना गर्दै महासंघले रकम वितरण गरेको हो ।
महामारीका बेला अग्रपंक्तिमा खटिएका संचारकर्मीलाई इटहरी उपमहानगरपालिकाको सहयोगमा लेखनवृत्ति संचालन भएको थियो । इटहरी उपमहानगरका गतिविधि समेटेर २८ जना संचारकर्मीलाई लेखनवृत्ति प्रदान गरिएको हो ।
कार्यक्रममा नेपाल पत्रकार महासंघका केन्द्रीय सदस्य अमर खड्काले प्रेस स्वतन्त्रताका संवन्धमा महासंघको एकै धारणा रहेको बताए । पछिल्लो समय प्रेसमा अंकुस लगाउन खोजिएको पनि खड्काले बताए । प्रेस चौतारी नेपालका केन्द्रीय उपाध्यक्ष लिलाराज भट्टराईले महासंघले आमसंचारका संदर्भमा तालिमको आयोजना गर्नुपर्ने बताए ।
लेखनवृत्तिमा सम्पादकको भूमिका निर्वाह गरेका प्राध्यापक अर्जुन उप्रेतिले सहभागि संचारकर्मीमा प्रवल सम्भावना रहेको र त्यसमा निखारताको आवस्यक्ता रहेको बताए । इटहरी उपमहानगरपालिकाले कला साहित्यमा ध्यान नदिएको भन्दै साहित्यकार कृष्णविनोद लम्सालले उपमहानगरको ध्यानाकर्षण गराएका छन् ।
रकम वितरण कार्यक्रममा इटहरी उपमहानगरकी उपमेयर लक्ष्मी गौतमले नेपाल पत्रकार महासंघ सुनसरीले इटहरी उपमहानगरपालिकाले भोगचलनमा दिएको जग्गामा भवन बनाउन आग्रह गरेकी छिन् । उनले भवन निमार्णका लागि इटहरी उपमहानगरपालिकाबाट केही बजेट विनियोजन गर्ने पनि वताइन् ।
उपमेयर गौतमले अहिलेसम्मका लेखनवृत्तिलाई समेटेर पुस्तक प्रकासन गर्ने पनि स्पस्ट पारेकी छिन् ।
