इटहरी । प्रदेश १ को प्रदेशसभाको आठौँ तथा बजेट अधिवेशन सोमबारदेखि सुरु भएको छ । आज सुरु भएको बजेट अधिवेशनमा विपक्षी दलहरु सरकारविरुद्ध खरो रुपमा प्रस्तुत भएका छन् ।
सरकारले संघीयताको मर्म अनुसार काम नगरेको, संघीय सरकारको प्रतिगामी कदमको साथ दिएको, कोरोना महामारी नियन्त्रणमा कुनै प्रभाबकारी काम नगरेको र संसदलाई छलेर अगाडि बढेको भन्दै विपक्षी दलहरुले आलोचना गरे । नेकपा माओवादी केन्द्र संसदीय दलका नेता इन्द्रबहादुर आङ्बोले सरकारले बजेट बनाइसकेपछि किन बैठक बोलाएको भन्दै प्रस्न गरे ।
नेपाली काँग्रेस संसदीय दलका नेता राजीव कोइरालाले सरकारले नै सदन बहिष्कार गर्ने जस्तो असंसदीय हर्कत प्रदेशमा देखिएको बताए । सरकारले सदनलाई लामो समय उपेक्षा गरेको भन्दै भन्दै उनले प्रदेशमा यतिधेरै समस्या आउँदा पनि सरकार सदन छलेर मनमौजी रुपमा चल्न थालेको उनको भनाई छ ।
बैठकमा जनता समाजवादी पार्टीका सांसद जयराम यादवले सरकारका कारण आपूmहरु जनप्रतिनिधि भएर जनताको बीचमा जान पनि लाज लाग्ने अवस्था भएको बताएका छन् । यसैगरी संघीय लोकतान्त्रिक राष्ट्रिय मञ्चकी सांसद विष्णुमायाँ तुम्बाहाम्बेले सरकारले संघीयताको मर्म अनुसार काम नगरेको भन्दै सानातिना बजेटमा संघीय सरकारको आँखा लाग्नु गलत भएको उल्लेख गरिन् ।
राप्रपाकी सांसद इन्दिरा राईले प्रदेश सरकारले ल्याउने बजेटले कोरोना महामारीलाई सम्बोधन गर्न सक्नुपर्ने बताएका छन् ।
राजनीतिमा देखिएको समस्याले बैठकमा ढिलाईः मुख्यमन्त्री
मुख्यमन्त्री सेरधन राईले अधिवेशनको पहिलो बैठकलाई सम्बोधन गर्दै राजनीतिमा देखिएको समस्याले बैठकमा ढिलाई भएको बताएका छन् । नेकपा फुटलाई पनि कोभिड महामारीकै संज्ञा दिदै दुबै थरि कोभिडले व्यवधान गरेको र बैठक ढिलो बैठक बोलाइएको मुख्यमन्त्रीको जवाफ छ ।
संसद्को अर्को बैठक आज(मंगलबार) दिउसो साढे १२ बजे बस्नेछ ।
