इटहरी । जिल्ला प्रशासन कार्यालय सुनसरीले कोरोना संक्रमण नघटेको भन्दै जेठ ३१ गते सम्म निषेधाज्ञा थप गरेको छ ।
यसअघि थपिएको निषेधाज्ञाको अवधि शनिवार राती १२ बजे सकिन लागेपछि जिल्लाको डिसिसिएमसीको शुक्रबार बसेको बैठकले थप एक साताको लागि निषेधाज्ञा अवधि बढाउने निर्णय गरेको हो ।
थप गरिएको निषेधाज्ञामा यसअघि जस्तै सर्वसाधारणहरूलाई औषधी खरिद र उपचारबाहेक घरबाट बाहिर निस्कन नदिने निर्णय भएको छ ।
यता मजदुरहरूलाई भने निर्वाधरुपमा आवतजावत गर्न दिइने निर्णय भएको छ । कृर्षि तथा निर्माण मजदुरलाई स्वास्थ्य मापदण्ड पुरा गरेर आवतजावत गर्न दिने निर्णय भएको छ भने उद्योग तथा कलकारखानामा कार्यरत मजदुरहरूलाई बिहान ५ बजे देखि ७ बजेसम्म र बेलुकी पनि ५ देखि ७ बजेसम्म हिँड्न दिइने प्रशासनले जनाएको छ ।
बैङ्क तथा वित्तीय संस्थाहरू सम्बन्धित स्थानीय तह तथा उद्योग वाणिज्य सङ्घहरूको समन्वयमा हप्तामा ३ दिन (आइतबार, मङ्गलवार र बिहीबार) स्वास्थ्य सुरक्षाका मापदण्ड पालना गरी न्यूनतम कर्मचारी राखी खुला गर्ने गरी थप व्यवस्था मिलाउने भनिएको छ ।
अत्यावश्यक सेवाका बाहेक अन्य सरकारी कार्यालयमा आवश्यक पर्ने कर्मचारीहरू बिहान ९ः०० बजे देखी १०ः०० बजेसम्म र दिउँसो ५ः०० बजे देखी ६ः०० बजेसम्म कार्यालयमा उपस्थित हुने प्रयोजनका लागी परिचय पत्रका आधारमा आवत जावत गर्न पाउने छन् ।
