इटहरी । पूर्वका विभिन्न चार जिल्लामा घटेका घटनामा चार जनाको ज्यान गएको छ ।
पाँचथरको फाल्गुनन्द गाउँपालिका–४ का ५८ बर्षीय पदम ध्वज नेम्वाङको पानीमा डुवेर ज्यान गएको छ । निबुखोलाको दोभानमा पानीमा डुवेर मृत अवस्थामा उनको सव फेला परेको प्रदेश प्रहरी कार्यालय विराटनगरले जानकारी दिएको छ ।
यसैगरी सोलुखुम्बु र उदयपुरको दुई छुट्टाछुट्टै स्थानमा भिरबाट लडेर २ जनाको मृत्यु भएको छ । सोलुखुम्बुको थुलुङ दुधकोशी गाउँपालिका–५ का २८ बर्षीय सिताराम बस्नेतको स्थानीय उत्तिसे भिरबाट लडेर मृत्यु भएको हो ।
उदयपुरको कटारी नगरपालिका–८ मरुवाखानी बस्ने २९ बर्षीया गिता बि.क.को घाँस काट्ने क्रममा भिरबाट लडेर मृत्यु भएको छ । बुधवार साँझ मरुवाखानीको जंगलमा घाँस काट्ने क्रममा अचानक भिरबाट लड्दा बि.क.को घटनास्थलमा नै मृत्यु भएको हो ।
यसैगरी ताप्लेजुङको फक्ताङलुङ गाउँपालिका–६ रानीपुल स्थितमा नव निर्मित बेलिब्रिज बनाउने क्रममा १ जना कामदारको मृत्यु भएको छ । बुधवार काम गरिरहेको अवस्थामा अचानक चिप्लिएर लडेको र सोही क्रममा पुल लगाउन राखिएको फलाम समेतले किच्दा बारा सिमराका २६ बर्षीय श्याम सुन्दर चौधरीको घटनास्थलमा नै मृत्यु भएको हो ।
चारै घटनाको संवन्धमा अनुसन्धान सुरु भएको प्रदेश प्रहरी कार्यालय बिराटनगरले जानकारी दिएको छ ।
