रामधुनी । फिल्म लप्पन छप्पन २ ले आफ्नो रिलिज मिति तोकेको छ । भोली शुक्रबारदेखि देशभरका हल खोल्ने निर्णय हल संचालकहरुले गरेसँगै निर्माताहरुले सिनेमाको प्रदर्शन मिति तय गर्न थालेका छन् ।
मुकुन्द भट्टको निर्माण तथा निर्देशनमा तयार भएको यो सिनेमालाई फागुण २७ गतेबाट रिलिज गर्ने तयारी गरिएको छ । महाशिवरात्रीको अवसर पारेर रिलिज हुन लागेको सिनेमालाइ द्धन्द्ध र थ्रिलर कथामा तयार पारिएको छ ।
यो सिनेमामा शिव श्रेष्ठ, सौगात मल्ल, अर्पण थापा, अनुप विक्रम शाही, गोविन्द शाही, प्रकाश कुँवर, दीपक क्षेत्री, राजेन्द्र बिष्ट, शक्ति श्रेष्ठ, सिर्जना सिना, केरोलिन कोलिन्डा, सुपर गुरुङ, आना ढकाल लगायतका कलाकारको अभिनय रहेकाे छ ।
सुरज अधिकारी र प्रजापति सिवाकोटी कार्यकारी निर्माता रहेको सिनेमामा प्रकाश कुँवर, निर्मलकुमार मिश्र, चिजकुमार श्रेष्ठ, सुदिपचन्द्र भक्रेल, सन्तोषचन्द्र भक्रेल निर्माताको रुपमा छन् ।
पुरुषोत्तम प्रधानको छायांकन, शम्भुजित बाँस्कोटा, राजेन्द्र भट्ट, दीपक आरजे र बुलेट फ्लेटको संगीत, नरेशनाथ योगीको कोरियोग्राफी रहेको यो फिल्ममा हिमाल केसीको द्धन्द्ध निर्देशन, मिलन श्रेष्ठको सम्पादन छ ।
