काठमाडौं । राष्ट्रिय मानव अधिकार आयोगले डा. गोविन्द केसीसँग यसअघि सरकारले गरेका सम्झौताहरु कार्यान्वयनको स्थिति सार्वजनिक गर्न सरकारलाई निर्देशन दिएको छ ।
गत भदौ २९ गतेदेखि अनशनरत डा. केसीको स्वास्थ्य अवस्था चिन्ताजनक बन्दै गइरहेको प्रति आयोगले गम्भीर ध्यानाकर्षण गराएको हो ।
डा. केसीको स्वास्थ्य अवस्थाबारे सरकारले चासोका साथ नहेरेको आयोगका प्रवक्ता तथा सचिव वेद भट्टराईले बुधबार जारी गरेको विज्ञप्तिमा उल्लेख गरिएको छ ।
आयोगले केसीसँग विगतमा गरिएका सम्झौताको पालना गर्न र उनको स्वास्थ्य तथा उचित मागहरुप्रति समयमै संवेदनशील बन्न सरकारलाई आग्रह समेत गरेको छ ।
विज्ञप्तिमा वार्ता र संवादको माध्यमबाटै कुनै पनि समस्याको समाधान हुने भएकाले त्यसतर्फ समयमै सार्थक पहल गरी जीवन रक्षा गर्न सरकारसँग आग्रह गरिएको छ ।
आयोगले आफ्ना मागहरु पूरा गराउन आमरण अनशनजस्तो जीवन नै जोखिममा पर्नसक्ने जटिल विकल्प नरोज्न डा. केसीलाई समेत आग्रह गरेको छ ।
बुधबार आयोगको बागमती प्रदेश कार्यालयको टोलीले महाराजगञ्जस्थित शिक्षण अस्पताल पुगी डा. केसीको स्वास्थ्य अवस्था सम्बन्धमा अनुगमन गरेको छ ।
