स्वास्थ्य तथा जनसंख्या मन्त्रालयले कोरोना परीक्षणका लागि स्वाब दिनेको पोजेटिभ वा नेगेटिभ रिपोर्ट जे आएपनि सम्बन्धितलाई नै जानकारी गराउन सरकारी तथा निजी ल्याबहरुलाई निर्देशन दिएको छ ।
यसअघि नेगेटिभ रिपोर्ट आए सम्बन्धित र पोजेटिभ आए इपिडिमियोलोजी तथा रोग नियन्त्रण महाशाखामा जानकारी गराउने व्यवस्था रहेकोमा अब रिपोर्ट जे आएपनि सम्बन्धित व्यक्तिलाई नै जानकारी गराउन मन्त्रालयका प्रवक्ता डा जागेश्वर गौतमले निर्देशन दिइएको बताए ।
पहिले जतिपनि संक्रमित थिए उनीहरुलाई स्वास्थ्य संस्थाको आइसोलेशनमा मात्रै राख्ने व्यवस्था रहेकोमा अहिले होम आइसोलेशनमा पनि राख्ने व्यवस्था रहेकाले यसअघिको निर्णय परिवर्तन भएको उनको भनाइ छ । संक्रमित व्यक्तिलाई रोग नियन्त्रण महाशाखाले जानकारी गराउने भन्दा ल्याबले सिधै जानकारी गराउँदा व्यवस्थापनमा छिटो हुने मन्त्रालयको भनाइ रहेकोछ।
केही मेडिकल कलेजहरुले विद्यार्थीहरुलाई पीसीआर गरेर मात्रै परीक्षामा सहभागी गराउने निर्णय गरेको भन्दै मन्त्रालयले त्यसो नगर्न समेत जानकारी गराएको छ ।
