वैकल्पिक सिकाइ विधि शिक्षकको सक्रियतामा निर्भर रहने भएकोले सरकारले तत्काल आफू कार्यरत विद्यालयमा पुग्न सामुदायिक विद्यालयका शिक्षकलाई निर्देश दिएको छ ।
शिक्षा, विज्ञान तथा प्रविधि मन्त्री गिरिराजमणि पोखरेलले शिक्षकहरुकै सक्रियतामा वैकल्पिक विधिको सिकाइ अगाडि बढ्ने भएकोले शिक्षकहरू तत्काल विद्यालयमा पुग्नुपर्ने बताए ।
शिक्षा पत्रकार समाजले शनिबार आयोजना गरेको भर्चुअल संवादमा मन्त्री पोखरेलले शिक्षकको कोरोना भाइरस बीमा समेत गरिएको स्पष्ट गर्दै सम्वन्धित जिल्ला प्रशासन कार्यालयसँग समन्वय गरी शिक्षकहरू तत्काल विद्यालयमा पुग्नुपर्ने जानकारी दिए ।
शिक्षक विद्यालयमा नपुगेसम्म वैकल्पिक विधिको सिकाइ सफल रुपमा सञ्चालन हुन नसक्ने पोखरेलको भनाइ छ । अभिभावकहरुसँग सम्पर्क गरी सिकाइ सहजीकरण निर्देशिका र विद्यालय शिक्षासम्बन्धी आकस्मिक कार्ययोजनाको कार्यान्वयनमा जुट्न उनले आह्वान गरे ।
समाचार आजको गोरखापत्र दैनिक
