इटहरी । नक्कली नेपाली नोटसहित पाँच जनालाई प्रहरीले पक्राउ गरेको छ। जिल्ला प्रहरी कार्यालय सुरखेतले सोमबार साँझ एक विशेष अपरेसनका क्रममा १,३०० थान नक्कली नोट बरामद गरेको हो ।बरामद भएको रकम १३ लाख ३३ हजार रहेको छ।
प्रहरीले विषेश सुराकीको आधारमा कर्णाली प्रदेश स्थित वीरेन्द्रनगर नगरपालिका र आसपासका क्षेत्रमा छापा मारेको थियो। प्रहरीले नक्कली नोट बनाउने तथा वितरण गर्ने गिरोहमा संलग्न रहेको आशंकामा विभिन्न स्थानबाट उपकरणसहित उनीहरूलाई पक्राउ गरेको हो।
पक्राउ परेका व्यक्तिहरूमा कञ्चनपुर घर भई हाल कुपिनेडी बस्ने दिलबहादुर सिंह, दैलेखका राम बहादुर सिंह, कुपिनेडीकी दिलमाया सिंह, तथा कोहलपुर नगरपालिका बस्ने अञ्जली नाम गरेकी २१ वर्षीया महिला रहेका छन्। उनीहरूबाट ९८ थान एक हजार दरका, १,२०० थान पाँच सय दरका र २ थान एक सय दरका नक्कली नोटहरू बरामद गरिएको प्रहरीले जनाएको छ।
साथै प्रहरीले नोट छाप्ने क्रममा प्रयोग भएका प्रिन्टर, कम्प्युटर मोनिटर, स्क्यानर, र विभिन्न कागज, रङ, कार्ड तथा नोट डिजाइनसम्बन्धी सामग्रीसमेत बरामद गरेको छ।
प्रहरी प्रवक्ता मोहनजंग बुढाथोकीका अनुसार, यो गिरोहले स्थानीय बजारमा नक्कली नोट वितरण गरी आर्थिक ठगी गर्दै आएको थियो। घटनाको थप अनुसन्धान भईरहेको र उनीहरूलाई आवश्यक कानुनी कारबाहीका लागि जिल्ला अदालतमार्फत म्याद थप गर्ने तयारी भईरहेको छ ।
