स्कटल्यान्ड । युकेमा पहिलोपटक नेपाली मूलका आदिवासी जनजातिका कथा बोकेका फिल्महरूलाई विश्वसामु चिनाउने ऐतिहासिक प्रयासस्वरूप ‘नेपाल आदिवासी जनजाति चलचित्र महोत्सव २०२५’ स्कटल्यान्डको राजधानी एडिन्बरामा १९ जुलाई २०२५ मा आयोजना हुने भएको छ ।
नेपाल स्कटल्यान्ड एसोसिएसन तथा नेपाल चलचित्र निर्देशक समाज को सह–आयोजनामा हुने महोत्सव Hall, 12C Macmillan Cres, Edinburgh EH4 4AB मा आयोजना हुन लागेकाे हाे । गत १० फेब्रुअरीमा औपचारिक रुपमा घोषणा गरिएको यो महोत्सवको संयोजक संस्था नेपाल स्कटल्यान्ड एसोसिएसनका अध्यक्ष विजय डंगोल रहेका छन् ।
महोत्सवको प्रमुख अतिथि बेलायतस्थित नेपाली राजदूत महामहिम चन्द्र कुमार घिमिरे रहनेछन्। त्यस्तै विशेष अतिथिमा स्कटिस पार्लियामेन्ट सदस्य फाइजल चौधरी,Oakminster Care Home Ltd की CEO सुनिता पोदार, चलचित्रकर्मीहरू, समाजसेवीहरू, युके तथा स्कटल्यान्डका संघ–संस्थाका प्रतिनिधिहरूको उपस्थिति रहने बताइएको छ।
आयोजक संस्थाले महोत्सवको सफल आयोजनाका लागि देस तथा विदेसमा संघ–संस्था र चलचित्र क्षेत्रका विशिष्ट व्यक्तित्वहरूको सल्लाहकार समिति समेत गठन गरिसकेको छ। महोत्सव निर्देशक संयोजक अरुण कुमार प्रधान, व्यवस्थापन संयोजक सुभाष थापा वाग्ले, तथा कलाकार संयोजक प्रकाश राणा मगर रहेका छन्।
यो महोत्सवमा कुल ४१ वटा चलचित्र प्रदर्शन गरिनेछ । जसमा १५ वटा सर्ट फिल्म, ५ वटा वृत्तचित्र, १३ वटा आदिवासी जनजाति फिल्म र ८ वटा आदिवासी कथामा आधारित मुख्यधाराका चलचित्रहरू रहेका छन्। प्राप्त ६० फिल्म आवेदनमध्ये उत्कृष्ट ४१ फिल्म छनोट गरिएको निर्देशक प्रधानले जानकारी दिए ।
महोत्सवको दिन, १९ जुलाईमा विशेष फिल्म ‘अञ्जिला, लाखे आजु, कर्साङ, मुख्या’ लगायतका सर्ट फिल्महरू प्रदर्शन गरिने प्रधानले जानकारी दिए ।
महोत्सवमा चलचित्र प्रदर्शनसँगै ‘जातीय खाना उत्सव’, ‘जातीय पहिरन प्रदर्शनी’, अन्तरक्रिया कार्यक्रम, सांस्कृतिक प्रस्तुती, सम्मान तथा अवार्ड वितरण कार्यक्रम पनि आयोजना गरिनेछ।
कार्यक्रमको मुख्य उद्देश्य नेपाली आदिवासी जनजातिका कला, भाषा, संस्कृति र जीवनशैलीलाई विश्वसामु उजागर गर्नुका साथै नेपाली फिल्म क्षेत्रमा विश्वव्यापी लगानी आकर्षित गर्नु रहेको छ।
महोत्सवकै दिन, १९ जुलाई दिउँसो १ बजे देखि २ बजेसम्म, अन्तर्राष्ट्रिय लगानीदाताहरूसँग अन्तरक्रिया हुने छ। यसले नेपाली चलचित्र उद्योगलाई सशक्त पार्न वैदेशिक लगानीलाई प्रेरणा दिने अपेक्षा आयोजकले गरेको छ ।
