इटहरी । हाल देशभर प्रदर्शन भइरहेको फिल्म ‘नरसिंहा अवतार’को प्रचारप्रसारलाई थप प्रभावकारी बनाउन निर्माण युनिट कोशी प्रदेशका विभिन्न स्थानमा रहेका फिल्म हलमा दर्शकहरूसँग भेटघाट गर्न आउने भएको छ । महानायक राजेश हमालसहितको टीम सोमबार कोशी प्रदेशका दर्शकहरूलाई प्रत्यक्ष भेट्ने र फिल्मको बारे प्रतिक्रिया लिने उद्देश्यलेका साथ पूर्व आउन लागेको हो ।
हमालसँगै अभिनेत्री सनिशा भट्टराई, अभिनेता राज कटवाल, फिल्मका निर्माता नरेन्द्र महर्जन र वितरक छविराज ओझा समेत हल भ्रमणमा सहभागी हुनेछन् । टिमले १२ गते बिहान ११ बजे विर्तामोडका दर्शकहरूसँग भेट्ने समय तालिका रहेको छ । भने दिउँसो २ बजे दमक, ४:३० बजे धरान र साँझ ५ ३० बजे इटहरीका दर्शकहरूसँग भेटघाट गर्ने कार्यक्रम रहेको छ । यस्तै साँझ ६:३० बजे विराटनगरका दर्शकहरूसँग टिमले भेटघाट गर्ने छ ।
दिवाकर भट्टराईद्वारा लिखित तथा निर्देशित ‘नरसिंहा अवतार’ नेम महर्जनको क्रिएटिभ सिने आर्ट्सको ब्यानरमा निर्माण भएको हो । फिल्ममा दीपक शर्मा, नरेन्द्र महर्जन र ध्रुव न्यौपानेको लगानी रहेको छ भने कथा चन्द्र पन्तले लेखेका हुन् । ‘नरसिंहा अवतार’मा राजेश, राज र सनिशाको साथमा नीति शाह, सरोज खनाल, निर शाह, अर्जुन श्रेष्ठ, उषा खड्गी, दीपा शाही, प्रशान्त ताम्राकार र राजिव जङ बस्नेत लगायतका कलाकारहरूको अभिनय रहेको छ । फिल्मले दर्शकहरूबाट सकारात्मक प्रतिक्रिया पाइरहेको छ ।
