इटहरी नेकपा एकीकृत समाजवादीका अध्यक्ष तथा पूर्वप्रधानमन्त्री माधवकुमार नेपालले प्रदेश १ को नाम कोसी राख्नु राम्रो भएको दाबि गरेका छन् ।बुधबार इटहरीमा पत्रकारहरूसँगको अन्तरक्रिया कार्यक्रममा बोल्दै उनले प्रदेशको नामकरण कोसी राखिनु राम्रो भएको बताए ।
यसअघि बागमती, गण्डकी, कर्णाली, लुम्बिनी जस्ता नाम राखिएको स्मरण गर्दै उनले यो प्रदेशको नाम कोसी राखिनुले सबै क्षेत्रको पहिचान समेटिएको टिप्पणी गरेका छन् ।
‘देश बहुसांस्कृतिक, बहुभाषिक, बहुजातीय छ, यसै सन्दर्भमा साझा पहिचानको नाम कोशी बहुमतले पारित भएको छ, राम्रो भयो, सगरमाथा राखिएको भएपनि राम्रै भन्ने थिएँ,’ नेपालले भने, ‘प्रत्येक समुदाय र आम मानिसको भावनाको कदर गर्नुपर्छ, पछिल्लो समय देशलाई जातीय द्धन्दमा लैजान खोजिदैँछ ।’
उनले नामकरणको विषयमा सचिवालयमा समेत यसअघि छलफल गरेको बताए । उनले भने, ‘अन्य प्रदेशको नामकरण भूगोलकै आधारमा भएको छ, यो प्रदेशमा पनि बहुमत सदस्यले कोसी पारित गरिएको छ, यसले राम्रो भएको छ ।’
उनले केही पहिचानबादीहरुले देशलाई जातीय द्धन्दतर्फ उन्मुख गरेको बताएका छन् । जनताबाट निर्वाचित प्रदेशसभा सदस्यहरुले नामकरण गरेकाले सबैले स्वीकार गर्नुपर्ने बताए ।
यसैबीच पछिल्लो समय नेताहरुबीच आरोप प्रत्यारोप भइराखेको र यसले फाइदा नगर्ने भन्दै देशमा अहिले राजतन्त्र फक्र्याउने प्रयास समेत भइरहेकाले आँफू जानकार रहेको उनले बताए ।
