पाँचथर । फिदिम नगरपालिकाले योजना पारदर्शी गर्न र सम्झौता बमोजिमको गुणस्तरीय काम गर्न उपभोक्ता समितिलाई सचेत गराउने उदेश्यले उपभोक्ताहरूलाई धमाधम अभिमुखिकरण तालिम प्रदान गरेको छ ।
योजना संचालन गर्ने तरिका, विधि, योजना सम्पन्न भए पश्चात आवश्यक कागजातहरूको बारेमा जानकारी दिने र योजना सम्पन्न पश्चात सार्वजनिक सुनुवाई गर्ने लगायतका विषयमा तालिम प्रदान गरिएको फिदिम नगरपालिकाका प्रमुख प्रशासकिय अधिकृत गणेश प्रसाद दाहालले बताए ।
नगरपालिकाले १४ वटै वडामा धमाधम अभिमुखिकरण तालिम प्रदान गरिरहेको जनाएको छ । अहिलेसम्म ५ वटा वडामा तालिम प्रदान गरिसकिएको र बाँकी ९ वटा वडामा दशैं अगाबै अभिमुखिकरण तालिम प्रदान गरिसक्ने दाहालले जानकारी दिए ।
अभिमुखिकरण तालिम पश्चात योजना संचालन गर्न सहज हुने, सम्झौता बमोजिम गुणस्तरीय कामय हुने अपेक्षा राखिएको फिदिम(२ का वडा अध्यक्ष दिनानाथ अधिकारीले बताए । अभिमुखिकरण कार्यक्रममा फिदिम नगरपालिकाका प्रमुख मित्रप्रसाद काफ्ले तथा उपप्रमुख राधाकृष्ण न्यौपानले उपभोक्ता समितिलाई सम्झौता तथा लागत स्टेटमेन्ट बमोजिम गुणस्तरीय काम गर्न निर्देशन दिएका छन् ।
त्यस्तै, फिदिम नगरपालिकाका प्रमुख प्रशासकिय अधिकृत दाहाल, प्राविधिक शाखा प्रमुख काफ्ले, योजना शाखा प्रमुख इन्दिरा दाहाल, रोजगार शाखा प्रमुख इन्द्र गुरुङ र लेखा शाखा प्रमुख हेम नेम्बाङ लगायतले सोही तालिमको सहजीकरण गरेका छन् ।
