काठमाडौं। इरानबाट कतारको राजधानी दोहा नजिकै रहेको अल उदीद सैन्य अड्डातर्फ मिसाइल प्रहार गरिएको थियो। कतारको सुरक्षा संयन्त्रले ती मिसाइलहरूलाई समयमै खसाल्न सफल भई कुनै पनि मानवीय वा भौतिक क्षति हुन नदिएको पुष्टि गरेको छ।
कतार सरकारका प्रवक्ता तथा प्रधानमन्त्रीका सल्लाहकार माजिद बिन मोहम्मद अल–अन्सारीले यस आक्रमणलाई कतारको सार्वभौमिकता, हवाई क्षेत्र तथा अन्तर्राष्ट्रिय कानूनहरूको गम्भीर उल्लङ्घन भन्दै गहिरो चिन्ता व्यक्त गरेका छन्। उनले यस्ता कार्यहरूले क्षेत्रीय स्थायित्वमा नकारात्मक असर पार्न सक्ने भन्दै तत्काल शान्तिपूर्ण संवादमा फर्कन आग्रह समेत गरेका छन् ।
अल–अन्सारीका अनुसार, आक्रमण हुनुअघि नै अल उदीद सैन्य अड्डाबाट सुरक्षाका सबै आवश्यक कदमहरू अपनाउँदै सैनिक र कर्मचारीहरूलाई सुरक्षित स्थानमा सारिएको थियो। यस आक्रमणबाट कुनै पनि व्यक्ति घाइते वा हताहत नभएको पुष्टि गरिएको छ।
इरानको इस्लामिक रिभोल्युसनरी गार्ड कर्प्स (आईआरजीसी) ले यस मिसाइल अभियानको जिम्मेवारी लिँदै यसलाई अभिनन्दनको विजयु नाम दिएको छ। उनीहरूले इराक र कतारमा रहेका अमेरिकी सैन्य अड्डाहरूलाई लक्ष्य गरिएको बताएका छन्। आईआरजीसीले अल उदीद अड्डालाई पश्चिम एसियामा अमेरिकी वायुसेनाको मुख्य केन्द्रु को रूपमा उल्लेख गरेको छ।
इरानले आफ्नो राष्ट्रिय स्वाधीनता, भूभागीय अखण्डता र सुरक्षामा भएको कुनै पनि हस्तक्षेपको जवाफ दिन आफू बाध्य हुने स्पष्ट पार्दै आएको छ। यो प्रहार अमेरिकी पक्षबाट शनिबार इरानका तीनवटा परमाणु केन्द्रमा गरिएका हवाई आक्रमणको प्रतिशोधस्वरूप गरिएको बताइएको छ।
यस घटनापछि खाडी क्षेत्रका विभिन्न मुलुकहरूले सुरक्षाको दृष्टिले हवाई मार्ग अस्थायी रूपमा बन्द गरेका छन्। कतार र संयुक्त अरब इमिरेट्सले आक्रमण हुनुअघि नै आकाश मार्ग बन्द गरिसकेका थिए भने बहराइन र कुवेतले पनि सोमबार आंशिक हवाई मार्ग बन्दको घोषणा गरेका छन्।
कतारको अल उदीद सैन्य अड्डा मध्यपूर्व क्षेत्रका लागि अमेरिकी तथा साझेदार राष्ट्रहरूको एक प्रमुख सैन्य आधार हो, जहाँ हजारौं सैनिकहरू तैनाथ छन्। यस घटनाले मध्यपूर्वको तनाव थप बढाएको छ।
