इटहरी । सहकारी वृत्तमा हाम्रो किसान : समृद्ध समाज, एउटै अभियान भन्ने मूल नारालाई आत्मसात् गर्दै, समाज रूपान्तरणको यात्रामा अग्रसर किसान कल्याण बचत तथा ऋण सहकारी संस्था लि. ले यस वर्ष पनि मातातीर्थ औंसी (आमाको मुख हेर्ने दिन) को अवसरमा ज्येष्ठ माता सम्मान कार्यक्रम आयोजना गर्ने भएको छ।
संस्थाको वार्षिक कार्यतालिका अनुसार, कार्यक्रम वैशाख १४ गते आइतबारका दिन इटहरी–१६ स्थित सहकारीको सभाहलमा आयोजना गर्न लागेको हो। कार्यक्रमबारे जानकारी दिँदै संस्थाका कार्यकारी अधिकृत पुष्कर बस्नेतले यसलाई आमाको माया र त्यागप्रतिको सम्मानको प्रतीकका रूपमा लिइएको बताए ।
कार्यक्रममा ७० वर्ष पूरा गरेका सेयर सदस्य आमाहरू र सदस्यका एकै घरमा बसोबास गर्ने मातृशक्तिहरूलाई सम्मान गरिनेछ। त्यस्तै संस्थाले सम्मानका लागि मापदण्ड समेत तयार गरेको छ । जसमा उमेर ७० वर्ष पूरा भएको हुनुपर्ने, अघिल्लो वर्षसम्म संस्थाबाट सम्मान प्राप्त नगरेको हुनुपर्ने, एकै घरमा बसोबास गर्ने कोही व्यक्ति संस्थाको सेयर सदस्य भएको हुनु पर्ने छ भने सम्मानित हुने आमाले कार्यक्रममा स्वयं उपस्थित हुनुपर्ने छ।
कार्यक्रमलाई थप व्यवस्थित बनाउन, संस्थाले सूचना प्रकाशित गर्दै आवेदनको लागि सम्पर्क गर्न अनुरोध समेत गरेको छ। इच्छुकहरूले आवश्यक विवरणसहित सहकारीको कार्यालय वा सेवाकेन्द्रहरूमा सम्पर्क गर्न सकिने संस्थाले जानएको छ ।
कार्यकारी अधिकृत बस्नेतले भने “यो कार्यक्रम मातृमूर्तिहरूको योगदानलाई सम्मान गर्ने हाम्रो सामाजिक जिम्मेवारी हो। हामी केवल सहकारी सञ्चालक मात्र होइनौं, सामाजिक मूल्यको संवाहक पनि हौं।”
