‘हामीले नेतृत्वमा नपुगे पनि विद्यार्थीका हक अधिकारका निम्ति जसरी लडेका छौँ । विद्यार्थी साथीहरूले हाम्रो टिमलाई न्याय गर्नुहुनेमा हामी विश्वस्त रहेका छौँ ।’
सुन्दरहरैंचा । स्वतन्त्र विद्यार्थी युनियनको आगामी चैत्र ५ गते हुने निवार्चनको मिति नजिकै गइरहेको छ । विभिन्न कारणले अवरोध भएका बाहेकका क्याम्पसमा निर्वाचनका लागि तयारी तीव्र छ ।
कोशी प्रदेशको उत्कृष्ट क्याम्पसमा पर्ने मोरङको सुन्दरहरैंचा १२ मा रहेको सुकुना बहुमुखी क्याम्पसमा पनि निर्वाचनको तयारी तीव्र छ । यस क्याम्पसमा उम्मेदवारहरू आफ्ना एजेन्डासहित भोट माग्न घरदैलोमा व्यस्त रहेका छन् ।
घरदैलोको क्रम मै भेटिएकी विद्यार्थी नेतृ सविना थापा यस पटक सुकुना बहुमुखी क्याम्पसमा नेपाल विद्यार्थी संघका उम्मेदवारले ऐतिहासिक जित हासिल गर्ने बताउँछिन् ।
सुकुना बहुमुखी क्याम्पसमा अहिलेसम्म नेपाल विद्यार्थी संघले नेतृत्व गर्ने अवसर गर्ने मौका नपाएको बताएकी उनले नेपाल विद्यार्थी संघको आबस्यक्ता अपरिहार्य रहेको बताइन् ।
‘हामीले नेतृत्वमा नपुगे पनि विद्यार्थीका हक अधिकारका निम्ति जसरी लडेका छौँ । विद्यार्थी साथीहरूले हाम्रो टिमलाई न्याय गर्नुहुनेमा हामी विश्वस्त रहेका छौँ ।’ उनले भनिन् ।
थापा सुकुनामा नेपाल विद्यार्थी संघको तर्फबाट कोषाध्यक्ष पदकी उम्मेदवार समेत हुन् । जसको नेतृत्व सभापति पदमा विजय ओझाले गरिरहेका छन् । नेपाल विद्यार्थी संघले स्ववियूको सचिव पदमा भने अर्जुन दाहाललाई उम्मेदवार बनाएको छ ।
‘समावेशिताका आधारमा सबैको प्रतिनिधित्व गरेर हामीले उम्मेदवार बनाएको अवस्था रहेको छ । हामीले सबैलाई न्याय भएको महसुस गरेका छौँ उनले भनिन्, अब हामी विद्यार्थीलाई न्याय गर्ने अवस्थामा पुग्ने छौँ ।’ थापाले भनिन् ।
उनले विद्यार्थी हक, अधिकार र समग्र हितका लागि निरन्तर सक्रिय रहँदै आएको उल्लेख गर्दै सङ्घर्ष र अनुभवहरूबाट प्रभावकारी जिम्मेवारी बहन गर्ने बताइन् ।
यसअघि स्ववियूको निर्वाचनमा समेत सदस्य पदमा निर्वाचित थापाले स्ववियुमा प्रतिनिधित्व गर्ने अवसर प्राप्त गर्दा विद्यार्थीका मुद्दाहरूमा केन्द्रित भएर काम गरेको उनले बताइन् ।
उनले भनिन् ‘वर्तमान विद्यार्थी राजनीतिमा महिला नेतृत्वको न्यून उपस्थिति गम्भीर विषय हो । समावेशिताको मात्र कुरा गर्ने होइन, त्यसलाई व्यवहारमा लागू गर्न सक्षम महिला नेतृत्वको आवश्यकता रहेको महसुस गर्दै म पनि अघि सरेकी हुँ ।’
तस्विरहरु : घरदैलो अभियान
