विराटनगर । कोशी प्रदेशका पूर्वमुख्यमन्त्री केदार कार्कीले आफूले ल्याएका समाजवादी कार्यक्रमलाई अहिलेको सरकारले कार्यान्वयन नगरे जस्तोसुकै संघर्षका लागि तयार रहने बताएका छन् । बुुधबार कोशी प्रदेश सभा सचिवालयको ‘मिडिया सेन्टर’मा पत्रकार सम्मेलनको आयोजना गरेर उनले बर्तमान सरकारले जनताका हितमा रहेका कार्यक्रमहरु कटौती गरेर बर्तमान सरकारले सेटिङै– सेटिङमा बजेट ल्याएको भन्दै त्यसका बिरुद्धमा आफूले संघर्ष गर्ने बताएका हुन् ।
बर्तमान मुख्यमन्त्री हिक्मत कार्की नेतृत्वको सरकारले १० वर्ष मुनिका बालबालिकाहरुको लागि निःशुल्क उपचार सेवा, जनावरमैत्री जंगल अभियान, महिला स्वंयसेविकाका लागि प्रोत्साहन भत्ता कार्यक्रम, केशलीया करिडोर निर्माण, शैलजा आचार्य हृदय रोग केन्द्र स्थापना तथा सञ्चालन, विपन्न विद्यार्र्थीलाई छात्रवृत्ति कार्यक्रम, सुकुम्बासीलाई जग्गा खरिदमा ब्याज अनुदान र प्रदेशमा सगरमाथा दिवस जस्ता कार्यक्रमलाई हटाइएकोमा त्यसप्रति पूर्वमुख्यमन्त्री कार्कीले आपत्ती जनाएका हुन् ।
जनताले तिरेको कर जनतालाई नै फर्काउने गरी जनताको पक्षमा ल्याइएको कार्यक्रमलाई कटौती गरेर झापामा पोखरी निर्माणको लागि चार करोड रुपैयाँ बजेट विनियोजन भएको भन्दै जनताका आवश्यक्ता बाहिरका त्यस्ता कार्यक्रममा आफूहरुले संघर्ष गर्ने निर्णयमा पुगेको उनले बताए ।
