इटहरी। उदयपुरको एउटा गाउँबाट यसवर्ष दुई करोड मूल्य बराबरको बेसार बिक्री भएको छ । उदयपुरको चौदण्डी गढी नगरपालिकाको सिद्धिपुर गाउँबाट दुई करोड मूल्य बराबरको बेसार बिक्री भएको हो ।
२०५० सालदेखि सिद्धिपुरका स्थानीयले व्यावसायिक बेसार खेती गर्दै आएका हुन् । सिद्धिपुरका झण्डै ५० घर परिवारमध्ये ३० घरले व्यावसायिकरुपमा नै बेसार खेती गर्दै आएको उनीहरुले बताएका हुन्। २०६० सालदेखि सबै गाउँलेले व्यावसायिक रुपमा बेसार खेती गर्न थालेपछि अहिले गाउँनै बेसार खेतीमय भएको उनीहरुको भनाइ छ ।
अहिले गाउँबाट वार्षिक दुई करोडभन्दा बढीको बेसार बिक्री हुने गरेको स्थानीय बेसार कृषकले बताएका छन् । नयाँ आधुनिक प्रजातिको सुगन्धा बेसार उत्पादन हुन थालेपछि खेती र उत्पादनमा वृद्धि भएको उनीहरु बताउँछन् । एक घरले वार्षिक झण्डै तीन लाखभन्दा बढीको बेसार उत्पादन गरेर बिक्री गर्ने गरेको बताइएको छ ।
उदयपुर जिल्लामा ५५९ हेक्टर क्षेत्रफलमा बेसार उत्पादन हुँदै आएको जिल्ला कृषि ज्ञान केन्द्र उदयपुरले जनाएको छ । सबैभन्दा बढी बेसार उत्पादन पाकेट क्षेत्रको रुपमा सिद्धिपुर क्षेत्र रहेको केन्द्रले जनाएको छ ।
यस्तै त्रियुगा नगरपालिकाको साउने, खाँबु, रौतामाई गाउँपालिकाको आँपटार, उदयपुगढी गाउँपालिकाको भलायाडाँडा, डुम्रेसहित कटारी नगरपालिकाको रिस्कु सोमबारे र बेलका नगरपालिकाको मैनामैनी क्षेत्र बेसार उत्पादनका लागि महत्वपूर्ण रहेको कृिष ज्ञान केन्द्रले जनाएको छ ।
