इटहरी । उपसभामुख अचानक विरामी भएर काठमाडौं प्रस्थान गरेपछी कोशी प्रदेशमा बिहान ८ बजे बोलाएको कोशी प्रदेशसभाको कार्यव्यवस्था परामर्श समितिको बैठक नै स्थगित भएको छ ।
परामर्श समितिका सदस्यहरु बैठकमा सहभागी हुन बैठकस्थलमा पुगेपनि उपसभामुखले अनुपस्थित रहने सूचना दिइसकेका कारण बैठक अगाडि नबढी स्थगित भएको हो ।
परामर्श समितिका सदस्यहरुबीच अनौपचारिक छलफल भने भएको छ । उपसभामुख सिर्जना दनुवारले आफू अचानक बिरामी भएकोले प्रदेशसभाको बैठक संचालन गर्न असमर्थ रहेको जानकारी दिएकी छिन् । प्रदेशसभाको अध्यक्ष मण्डलका सदस्य ईस्राईल मन्सुरीलाई अध्यक्षताको जिम्मेवारी दिएको उनले उल्लेख गरेकी छिन् । मन्सुरी कांग्रेसबाट निर्वाचित सदस्य हुन् ।
अहिले गठबन्धन दलका सांसदहरु आगामी रणनीतिका बारेमा छलफलमा जुटेका छन् । कार्यव्यवस्था परामर्श समितिको बैठक भने, दिउँसो १२ः१५ बजे बैठकको अध्यक्षता गर्ने जिम्मेवारी पाएका प्रदेशसभा सदस्य मन्सुरको उपस्थितिमा बस्ने सहमति भएको छ ।
सोमबार दिउँसो १ बजेका लागि बोलाइएको प्रदेशसभा बैठकमा आफ्ना ज्येष्ठ सांसदलाई अनुपस्थित गराउने निर्णय एमालेले लिएपछि सांसदहरुले प्रदेशसभा सचिवालयमा ‘घरयासी कारण’ भन्दै अनुपस्थित रहने सूचना दिएका छन् ।
सभामुख बाबुराम गौतमको राजीनामा गराएर ९३ सदस्यीय प्रदेशसभामा ४७ सांसदको समर्थनसहित मुख्यमन्त्री भएका मुख्यमन्त्री उद्धब थापाले विश्वासको नपाउन लगभग निश्चित छ ।
