इटहरी । सुनसरीको धरान इटहरी सडक खण्डमा गोली हत्या गर्ने समूह मध्येका २ जनालाई प्रहरीले पक्राउ गरेको छ ।
विराटनगर ५ का २८ वर्षीय रोहित चौधरीलाई गोली हानी हत्या गरेको आरोपमा लेटाङ स्थायी घर भएका दीपक तिम्सिना र धरानका आसमान तामाङलाई प्रहरीले पक्राउ गरेर बुधवार सार्वजनिक गरेको हो ।
पक्राउ परेका आरोपीहरूको साथबाट पेस्तोल समेत बरामद गरिएको जिल्ला प्रहरी सुनसरीका प्रहरी प्रमुख प्रभु ढकालले फलैचान्यूजलाई जानकारी दिए । अन्य एकको सम्बन्धमा आवश्यक अनुसन्धान भइरहेको ढकालले बताए ।
साथीसँग धनकुटाबाट फर्कने क्रममा सेउती पुल नजिक मोटर साइकल रोकेर बसेका चौधरीलाई तीन जनाको हतियारधारी समूहले गोली प्रहार गर्दा गम्भीर घाइते भएका थिए ।
उपचारको क्रममा उनको बिपी कोइराला स्वास्थ्य विज्ञान प्रतिष्ठान धरानमा मृत्यु भएको थियो । हतियार धारी समूहले लुटपाट समेत गरेका थिए ।
