इटहरी । नेपाल आयल निगमले हवाई इन्धनको मुल्य घटाएको छ ।
मंगलबार निगमले विज्ञप्ति जारी गर्दै आन्तरिक र बाह्य हवाई इन्धनको मूल्य घटेको जानकारी दिएको हो ।
निगमका अनुसार हवाई इन्धन आन्तरिकमा प्रतिलिटर १० रूपैयाँ घटाइएको छ । योसँगै अब हवाई इन्धन आन्तरिक अब प्रतिलिटर १५० रूपैयाँ पर्नेछ ।
त्यस्तै हवाई इन्धन बाह्यमा प्रतिकिलोलिटर २ सय डलर (प्रतिलिटर करिब २६ रूपैयाँ) घटाइएको छ । हवाई इन्धन बाह्य अब प्रतिकिलोलिटर १ हजार १५० डलर (प्रतिलिटर करिब १५१ रूपैयाँ) पर्नेछ । नयाँ मूल्य मंगलबार राति १२ बजेदेखि लागू हुनेछ ।
हवाई इन्धनको मूल्य घटेसँगै नेपाल नागरिक उड्डयन प्राधिकरणले बुधबारदेखि नै लागू हुने गरी आन्तरिक उडानतर्फको भाडादर घटाउने जानकारी दिएको छ ।
