इटहरी । प्रदेश नं १ का प्रदेश सभा सदस्य केदार कार्कीले प्रदेश सभामा शून्य समयमा बोल्न नदिनु ‘सेटिङ’ भएको आरोप लगाएका छन् । सोमबार प्रदेशसभाको बैठक थियो । तर, सांसदहरूले शून्य समय लिएर बोल्न नपाएका हुन् ।
सांसद निर्वाचित भएको ३ महिना पुग्न लाग्दा पनि निर्वाचनको क्रममा जनतासँग गरेको वाचाअनुसार जनसरोकारका विषय संसदमा सांसदहरुले उठाउन नपाएको उनको भनाई छ ।
मंसिर ४ गतेको निर्वाचनपछि गठन भएको प्रदेशसभाको पहिलो बैठक पुस १७ गते बसेको थियो । पहिलो बैठकमा पनि सांसदहरूले शून्य समयमा बोल्न पाएका थिएनन् ।
प्रदेशसभा बैठक चलिरहँदा कार्कीले टेबल ढ्याप–ढ्याप गरेका थिए । त्यतिबेला सभामुख बाबुराम गौतमले मन्त्रिपरिषदको कार्यविभाजन र जिम्मेवारीसम्बन्धी पत्र पढेर सुनाउँदै थिए ।
कार्कीले मागेको ढ्याप–ढ्यापे समयप्रति सभामुख गौतम नै अनभिज्ञ बने । मंगलबारको बैठकमा प्रदेश प्रमुख पर्शुराम खापुङले सम्बोधन गर्ने कार्यक्रम रहेको छ ।
