काठमाडौं । संविधान दिवसको अवसरमा सरकारले करिब १ हजार जनालाई विभिन्न मानपदवी, अलङ्कार र पदक दिने भएको छ ।
गृहमन्त्रालयले सार्वजनिक गरेको सूची अनुसार यस पटक पूर्वप्रधानमन्त्री स्वर्गीय सुशील कोइरालालाई नेपाल रत्न प्रदान गरिने भएको हो । त्यस्तै राष्ट्र गौरव स्वर्गीय जीवराज न्यौपाने आश्रित, तत्कालिन मन्त्रिपरिषद अध्यक्ष खिलराज रेग्मी र संस्कृतिविद् सत्यमोहन जोशीलाई मानपदवी दिइने भएको छ ।
त्यस्तै संस्कृतिविद् जगमान गुरुङलाई सुप्रसिद्ध प्रवल जनसेवाश्री प्रदान गरिने भएको छ । सुकीर्तिमय राष्ट्रदीपबाट कलाकार निर शाह, अभिनेता राजेश हमाल, कलाकार मदनकृष्ण श्रेष्ठ र हरिवंश आचार्य लगायतलाई समेत प्रदान गरिने छ । मानपदवी र अलंकार पाउने सूचीमा ठूलो संख्या निजामति तथा जंगी कर्मचारी, राजनीतिक दलका कार्यकर्ता र ब्यापारीहरुको रहेको छ ।
यसैबीच, संविधान दिवसको अवसरमा राष्ट्रपति विद्यादेवी भण्डारीले गृहमन्त्रालयको सिफारिसमा ६ सय ८१ कैदीबन्दीको बाँकी सजाय समेत मिनाहा गरिदिएकी छिन् ।
