काठमाण्डौ । पछिल्लो समय डेंगीको संक्रमण ७२ जिल्लामा फैलिएको छ। डेंगीको संक्रमण फैदिएसँगैं जोखिम भएकाले अझै दुई महिना उच्च सतर्कता अपनाउन सबैमा आग्रह गरिएको छ ।
गएका वर्षहरुमा पनि असोज र कात्तिक महिनामा डेंगीको संक्रमण धेरै बढेको पाइएको थियो । यसपालि भदौमै डेंगीको संक्रमण फैलिरहेको छ । बेलैमा सचेत नभएमा आउँदो दुई महिनामा जोखिम झन् बढ्न सक्ने इपिडिमियोलोजी तथा रोग नियन्त्रण महाशाखा अन्तरगतको कीटजन्य रोग निवारण शाखाका प्रमुख डाक्टर गोकर्ण दाहालले बताए। उनका अनुसार अहिलेसम्म ३ हजार २ सय २७ जनामा डेंगी पुष्टि भएको छ । जिल्ला जिल्लाबाट नयाँ तथ्याङ्क आएकाले यो संख्या अझै बढ्ने उनले बताए ।
सबैभन्दा धेरै वाग्मती प्रदेशमा फैलिएको छ । बागमतीमा २ हजार १ सय ८ जनामा संक्रमण पुष्टि भएको छ । यस्तै, लुम्बिनी प्रदेशमा ४ सय ७२ जनामा, प्रदेश १ मा १ सय ९८ जनामा, गण्डकी प्रदेशमा ८४ जनामा, सुदूरपश्चिममा ७७ जनामा, मधेस प्रदेशमा ५९ जना र कर्णाली प्रदेशमा २९ जनामा डेंगी संक्रमण देखिएको सरकारी तथ्याङ्कमा उल्लेख छ । तथ्याङ अनुसार १० जिल्लामा जोखिम धेरै रहेको छ । वाग्मती प्रदेशको ललितपुर जिल्लमा सबै धेरै संक्रमण फैलिएको छ । अहिलेसम्म ललितपुरका एक हजार एक सय ८० जनामा संक्रमण पुष्टि भएको छ । यस्तै काठमाण्डौमा ५ सय ६५जनमा, रुपन्देहीमा ३ सय ९२ जनमा, भक्तपुरमा ८९ जनामा, तेह्रथुम र धादिङमा ७८ जनामा, सिन्धुलीमा ६३ जनामा, संखुवासभा ५७ जनामा, गुल्मी ५२ जना र अर्घाखाँचीमा ५१ जनामा संक्रमण पुष्टि भएको छ ।
लामखुट्टेले फुल पार्ने र लार्भा हुर्कने वातावरण नबनाउन कीटजन्य रोग निवारण शाखाका प्रमुख डाक्टर गोकर्ण दाहालले सबैमा आग्रह गरेका छन् । घर वरिपरि पानी जम्ने खाल्डाखुल्डी पुर्न, पूरा बाउला भएका लुगा लगाउन, बाल्टी, बाटा, ड्रम लगायत भाँडोमा लामोसम्म पानी जम्मा गरेर नराख्न उनले सुझव समेत दिएका छन् । यस्तै, कोठामा सजाएर राखिएका फूलदानीमा पनि डेंगी सार्ने लामखुट्टेले फूल पार्ने हुँदा बेला बेला पानी फाल्न र सफा गरिरहन उनले आग्रह गरेका छन् । यस्तै, गाडीका टायरमा जमेको पानीमा पनि लमखुट्टेले फूल पार्ने हुँदा जमेको पानी हटाउन सुझाव दिइएको छ । लामखुट्टे नियन्त्रण नै डेंगी रोकथाको मुख्य उपाय रहेको छ ।
यसैबीच, ज्वरो आउनासाथ र जिउ दुख्नासाथ धेरैले जथाभाबी औषधि खाने गरेकाले त्यसो नगर्न पनि कीटजन्य रोग निवारण शाखाका प्रमुख डाक्टर गोकर्ण दाहालले आग्रह गरेका छन् । डेंगी भएका बेला दुखाइ कम गर्नका लागि खाइने बुफ्रिनलगायतका औषधिले स्वास्थ्यमा झनै असर पर्ने भएकाले स्वास्थ्यकर्मी र डाक्टरको सल्लाहमा मात्रै औषधि खान सेवन गर्न उनले सबैमा आग्रह गरेका छन् ।
