काठमाडौं। गृह मन्त्रालयले भिटिज भिसामा खाडी मुलुक र मलेसियामा जान रोक लगाउने निर्णयलाई संशोधन गरेको छ । आइतबार एक विज्ञप्ति जारी गर्दै मन्त्रालयले भिटिज भिसामा जाने सबैलाई रोक लगाउने निर्णयलाई संशोधन गरेको हो ।
यस अघि सोमबारदेखि लागू हुने गरी भिटिज भिसामा खाडी मुलुक र मलेसियामा जान सबैलाई रोक लगाउने निर्णय संशोधन गर्दै मन्त्रालयले खाडी राष्ट्रबाहेक कम्तिमा दुई मुलुकको भ्रमण गरिसकेकालाई भ्रमण अनुमति दिइने बताइएको छ ।
यस्तै विरामीको कुरुवा वा रेखदेखका लागि जाने तीन पुस्ताभित्रका परिवारका सदस्यलाई नेपाली दूतावासको सिफारिस पत्र परराष्ट्र मन्त्रालयमार्फत जान दिने भनिएको छ । यस्तै नेपालमा सामान आयत–निर्यात गर्ने व्यवसायिक संस्थाका प्रतिनिधि, सरकारी कामको सिलसिलामा जाने प्रतिनिधि र अन्तर्राष्ट्रिय कारोबार गर्ने बैंक तथा वित्तीय संस्थाका प्रतिनिधि लगायतले पनि खाडी मुलुक र मलेसिया जान पाउने छन् ।
वैदेशिक रोजगारी व्यवसाय प्रबद्र्धनका लागि जाने मेनपावर कम्पनीका सञ्चालक र आधिकारिक प्रतिनिधि, वार्षिक न्यूनतम ६ लाख रुपैयाँ कर योग्य भएर त्यसको आधा रकम बैंक खातामा बचत भएका र नेपालको कर प्रणालीमा आबद्ध व्यक्तिले पनि भिजिट भिसामा जान पाउने मन्त्रालयको विज्ञप्तिमा उल्लेख गरिएको छ ।
