रामधुनी । सुनसरीको रामधुनी नगरपालिका वडा नम्बर ६ की वडा महिला सदस्य लक्ष्मी चौधरीले मनोमानी गरेको भन्दै स्थानीयले राजीनामा माग गरेका छन् ।
वडाको बजेटमा चौधरीले मनोमानी गरेको भन्दै स्थानीयवासीले स्पष्टीकरण सहित राजीनामा माग गरेका हुन् । शुक्रवार करिब ३० जनाको समूहमा पुगेका वडावासीले वडाध्यक्ष हेमनारायण राजधामीको कार्यकक्षमा चौधरीले ४ वर्ष गरेको कामको विवरण र हिसाब किताब मागेका छन् ।
वडाबाट सञ्चालन हुने कार्यक्रम तथा आयोजनाहरूमा चौधरीले आफ्नो श्रीमान् सहित परिवारका सदस्य र आफन्तहरूको प्रयोग गरेर वडाको बजेट मनोमानी ढङ्गले खर्च गरेको स्थानीयको आरोप छ । विकास निर्माण समितिको अध्यक्षमा चौधरीले आफ्नो श्रीमान् विन्देश्वर चौधरीलाई राखेर काम गरेको र काम समेत गुणस्तरहीन भएको भन्दै स्थानीयवासी आक्रोशित भएका थिए । पुलको नाममा वडा कार्यालयबाट चौधरीले बारम्बार लाखौँ माग गरेको भन्दै स्थानीयवासीले वडाको विकासमा भ्रष्टाचार गरेर वडालाई खाडलमा हाल्ने खेलमा चौधरी लागेको आरोप लगाएका छन् ।
स्थानीयवासी गणेश थिंङले ‘आफ्नो श्रीमानलाई किन मैनीको पुल निर्माण समितिको अध्यक्ष बनाएको’ भन्दै वडा सदस्य चौधरीलाई प्रश्न गर्दा चौधरीले स्थानीयको भेलाबाट अध्यक्षमा आफ्नो श्रीमान् विन्देश्वर चौधरीलाई राखेको जवाफ दिइन् । त्यस्तै स्थानीय दिनेश श्रेष्ठले मैनी कै व्यक्ति हुँदाहुँदै किन बक्लौरी बजार छेउमा घर भएको व्यक्ति मैनीको पुलको अध्यक्ष बनाइयो भनेर जवाफ माग्दा उनले कुनै उत्तर भने दिइनन् । प्रदेश सरकारको १० लाख र वडा कार्यालयको ५ लाख गरी जम्मा १५ लाख रुपैयाँमा बनेको सो पुलको काम भने पुरा भएको छैन ।
पुल निर्माणमा कमसल सामाग्री प्रयोग गरेको स्थानीयको भनाई छ । वडा सदस्य चौधरीका श्रीमान् अध्यक्ष रहेको पुल अहिले खिया लागेर पुरानो जस्तो देखिन थालेको छ । पुलको मानिस हिँड्ने भागको भने एक पत्र उक्किन थालेको छ ।
जेठाजुलाई बोका, बोका भने गायव
वडाका विभिन्न काममा र सुविधाको प्रयोगमा आफन्तहरू प्रयोग गर्दै आएकी वडा महिला सदस्य लक्ष्मी चौधरीले आफ्नै जेठान बमर चौधरीलाई अनुदानमा आएको उन्नत जातको बिउको बोका दिएको खुलेको छ । उनले आफ्नो जेठान चौधरीको कृर्षि फम रहेको भन्दै आफूले अनुदानमा आएको बिउको बोका जेठानलाई दिएको स्वीकार गरिन् ।
तर, उनको जेठाजुले भने अनुदानमा आएको बोका काटेर मासु बिक्री गरेको पाइएको छ । फलैचान्यूजको टिम उनको जेठाजुको घरमा अनुदानमा आएको बोका हेर्न जाँदा परिवारले भने बोका काटेर खाई सकेको बताएका छन् । पहिले आफूले अनुदानको बोका पाएको र अहिले बोका विरामी भएपछि आफूले बोका काटेर खाएको परिवारको भनाई छ । चौधरीका जेठाजुले अनुदानमा आएको बोका काटेर ४५ केजी मासु बिक्री गरेको एक स्थानीयले बताए ।
निःशुल्क आएको धानको बिउ समेत बिक्री गरेको खुलासा
वडा सदस्य चौधरीले स्थानीय कृषकका लागि आएको धानको बिउ समेत प्रतिकिलो ४० रुपैयाँका दरले बिक्री गरेको खुलासा भएको छ । यस विषयमा चौधरीले आफले अनुदानमा आएको धानको बिउ बिक्री गरेको बत्ताइन् ।उनले २० किलो लाने कृषकलाई १० किलोको पैसा लिएको बत्ताइन् ।
सरकारी ह्युमपाइप आफ्नै घरमा प्रयोग
चौधरीले आफूखुसी सरकारी ह्युमपाइप आफ्नै घरअगाडि लगाएकी छिन् । स्थानीय दिनेश श्रेष्ठले निजी एक्स्काभेटर उत्खनन गरी वडाले अर्को ठाउँमा लैजान लागेको ह्युमपाइप चौधरीले आफ्नै घरअगाडि वडामा समेत नसोधी राखेको श्रेष्ठले बताए ।
यस विषयमा रामधुनी–६ का वडा अध्यक्ष हेमनारायण राजधामीले चौधरीले आफूलाई नसोधी ह्युमपाइप लगाएको बताए । साथै उनले चौधरीलाई वडाले स्थानीय जनताहरूको प्रश्नको उत्तर सहित वडामा स्पष्टीकरण मागेको बताएका छन् ।
