इटहरी । किसान कल्याण बचत तथा ऋण सहकारी संस्था लिमिटेड, इटहरीले ऋण लिएर पटक–पटक ताकेता गर्दा पनि नतिर्ने सदस्यहरूको नाम सार्वजनिक गरेको छ। सहकारीले अन्तिम पटक ५ दिनको समय दिँदै, त्यस अवधिमा सम्पूर्ण बक्यौता तिर्न अल्टिमेटम दिएको हो।
सूचनामा भनिएको छ, “सूचना प्रकाशित मितिले पाँच दिनभित्र सम्पूर्ण रकम चुक्ता नगरेमा सहकारी ऐन र नियमअनुसार कानुनी प्रक्रिया मार्फत ऋण असुल गरिनेछ।”
सहकारीले सार्वजनिक गरेको सूचीमा सुनसरी र उदयपुर जिल्लाका ६ जना व्यक्तिहरू रहेका छन्, जसले सहकारीबाट विभिन्न समयमा ऋण लिए पनि तोकिएको समयमा भुक्तानी गरेका छैनन्।
संस्थाले सार्वजनिक गरेका व्यक्तिहरुमा आशादेवी शाह सुनसरी, दिपक मगर सुनसरी, सञ्जयकुमार शाह सुनसरी,अनु वि.क. उदयपुर, सुबासरी राई सुनसरी र शिला गुरुङ सुनसरीका रहेका छन् ।
संस्थाले बक्यौता रकम संस्थाले तोकेको समय भित्र तिर्न अनुरोध गर्दै समयमा नतिरेमा कानुनी कारबाही गर्ने स्पष्ट पारेको छ। सहकारीले समयमै ऋण चुक्ता गर्ने अभ्यासले मात्र संस्थाको दिगोपनामा सघाउ पुग्ने भन्दै सबै सदस्यहरूलाई समयमै भुक्तानी गर्न आग्रह गरेको छ।
