रामधुनी । सुनसरीको इटहरी उपमहानगरपालिका–५ स्थित गोधुली पशुपालन सहकारी संस्था लिमिटेडले आफ्नो १८औँ बार्षिक साधारण सभा सम्पन्न गरेको छ। साधारण सभा कार्तिक २९ गते शनिबार इटहरी–५ बालग्रामस्थित इटहरी पार्टी प्यालेसमा आयोजना गरिएको थियो।
सभामा संस्था अध्यक्ष माधव पाठकले वार्षिक प्रतिवेदन प्रस्तुत गर्दै चालू आर्थिक वर्षमा संस्थाले रु। १३,८१,५९३ को खुद मुनाफा आर्जन गर्न सफल भएको जानकारी दिए।
हाल यस सहकारीमा ५५१ जना शेयर सदस्य आवद्ध रहेका छन्। साधारण सभामा विभिन्न विधामा उत्कृष्ट उपलब्धि हासिल गर्ने शेयर सदस्यहरू तथा ज्येष्ठ सदस्यहरूलाई सम्मान तथा पुरस्कार प्रदान गरिएको थियो।
अध्यक्ष पाठकका अनुसार गोधुली पशुपालन सहकारी संस्था विगत लामो समयदेखि सहकारी क्षेत्रमा सक्रिय रहँदै आएको छ। संस्थाले अवलोकन भ्रमण, रक्तदान कार्यक्रम, स्वास्थ्य शिविर, सहकारी शिक्षा तालिम लगायतका सामाजिक तथा समुदायमुखी कार्यक्रमहरू गर्दै आएको र आगामी दिनमा पनि यस्ता कार्यक्रमलाई निरन्तरता दिने लक्ष्य रहेको उनले बताए।
