धरान । कवि टेकनाथ घिमिरेद्वारा रचित ‘नेपाल मेरो घर’ नामक छन्दोबद्ध कवितासङ्ग्रह बिहिबार कार्यक्रमका बीच नेपाल संस्कृत विश्वविद्यालय, पिण्डेश्वर विद्यापीठ धरानमा विमोचन गरिएको छ।
कवितासङ्ग्रह ‘नेपाल मेरो घर’ मा विविध सामाजिक, सांस्कृतिक र समसामयिक विषयवस्तु समेटिएका छन्। कविताहरूमा देशप्रेम, मानवता, निष्ठा, आमाबाबुप्रतिको श्रद्धा र जीवनका संघर्षहरूलाई सरल भाषामा प्रभावशाली रूपमा प्रस्तुत गरिएको छ।
यस सङ्ग्रहमा मायाँ गरौँ देशको, गरिब, मेरो देश, जेन्जी, कोरोना, जन्मभूमि, नेपाल भन्दै उठ लगायत ७६ वटा कविताहरू समावेश छन्।
विमोचन समारोहमा बोल्दै कवि टेकनाथ घिमिरेले भने “जे जस्ता भावना आए श्रद्धाले गर्छु अर्पण, जसले संसार देखायो, उसैमा छ समर्पण। माता पिता सरि हुँदैनन् कोही संसारमा जन, श्रद्धा स्नेह दर्शाई, उनैमा छ समर्पण।”
उनले आमाको प्रेरणा र चाहनालाई पूरा गर्दै यो कवितासङ्ग्रह आमालाई नै समर्पण गरिएको बताए।
कार्यक्रममा उपस्थित अतिथिहरूले कवितासङ्ग्रह ‘नेपाल मेरो घर’ ले साँचो अर्थमा “नेपाल नै हाम्रो घर हो” भन्ने भावना प्रकट गरेको उल्लेख गर्दै कविको सिर्जनशीलता, भावना र देशप्रेमको उच्च प्रशंसा गरेका थिए।
कार्यक्रममा विद्यापीठका प्राध्यापक, विद्यार्थी, साहित्यकार तथा स्थानीय बौद्धिक व्यक्तित्वहरुको उपश्थिती रहेको थियो ।
