इटहरी । आजदेखि तिन दिन देशका धेरै स्थानमा मेघगर्जन र चट्याङसहित वर्षा र हिमपात हुने भएको छ ।
पश्चिमी वायु सक्रिय भएकाले आज बेलुकीदेखि पर्सिसम्म देशका धेरै स्थानमा वर्षा हुने सम्भावना बढेको जल तथा मौसम पूर्वानुमान महाशाखाले जनाएको छ ।
महाशाखाका अनुसार अहिले पश्चिमी वायु तथा पश्चिमी न्यून चापीय प्रणालीको आंशिक मात्र प्रभाव रहेकोले देशका पहाडी भूभागमा आंशिकदेखि साधरणतया बदली रही बाँकी भागमा मौसम मुख्यतया सफा रहेको छ । तराईका थोरै ठाउँमा हुस्सु तथा कुहिरो लागेको छ ।
आज दिउँसोपछि सुदूरपश्चिम प्रदेश र कर्णाली प्रदेशका केही ठाउँमा चट्याङसहित हल्का वर्षाको सम्भावना रहेको महाशाखाले जनाएको छ । यस्तै सुदूरपश्चिम, कर्णाली, गण्डकी, बागमती र कोशी प्रदेशका उच्च पहाडी तथा हिमाली भूभागका एक–दुई ठाउँमा हल्का हिमपातको सम्भावना रहेको छ ।
यसैगरी शुक्रबार काठमाण्डौ उपत्यकासहित मधेश प्रदेश बाहेक सबै प्रदेशमा पानी पर्ने सम्भावना रहेको मौसमविद् रोजन लामिछानेले बताए। उनका अनुसार आज बेलुकादेखि भोलिसम्म धेरै पानी पर्ने सम्भावना छ ।
पर्सि पनि मधेश प्रदेश बाहेक अरु प्रदेशका केही ठाउँमा मेघगर्जन र चट्याङ सहित वर्षा हुने अनुमान छ । तर पर्सि शनिवार आज र भोलिभन्दा कम वर्षा हुने मौसमविद् लामिछानेले बताए ।
मधेश र लुम्बिनी बाहेकका प्रदेशका उच्च पहाडी तथा हिमाली क्षेत्रमा भोलि र पर्सि हल्का हिमपातको समेत सम्भावना रहेको छ ।
पर्सि बेलुकादेखि धेरै ठाउँको मौसम क्रमिक सुधार हुँदै जाने महाशाखाले जनाएको छ । हिउँद यामको अन्तिम दिन आजदेखि हिउँदे वर्षा हुन लागेको हो । हिउँदमा सरदर ६० प्रतिशत पानी पर्ने भए पनि यो वर्ष अहिलेसम्म झण्डै १० प्रतिशत मात्र वर्षा भएको छ ।
