सुन्दरहरैचा । मोरङको सुन्दरहरैचामा नगरपालिका–७ स्थित केराघारीभित्र दुई नाबालिका मृत फेला परेका छन् । धनकुटाको पाख्रिबास नगरपालिका–४ डिकुरेका अर्जुन कार्कीका छोरीहरु ३ वर्षीया आइका र १ वर्षीया अर्पणाको शव फेला परेको मोरङ प्रहरीले जानकारी दिएको छ ।
शव नजिकै प्रहरीले मेटासिट नामको विषादी फेला पारेको छ । उनीहरुलाई केराघारीभित्र मृत अवस्थामा देखेर स्थानीयले प्रहरीलाई खबर गरेका थिए । यसैगरी, मृतक नाबालिकाहरुकी आमा २९ वर्षीया अस्मिता न्यौपानेसमेत सम्पर्कविहिन रहेको बताइएको छ । प्रहरीको प्रारम्भिक अनुसन्धान अनुसार, शुक्रबार राति दम्पतीबीच झै–झगडा भएको थियो । पतिसँग विवाद भएपछि नाबालिका छोरीहरुलाई लिएर राति ८ः३० बजेतिर अस्मिता हिँडेको प्रारम्भिक अनुसन्धानबाट खुलेको प्रहरीको भनाई छ ।
अस्मिताका श्रीमान् अर्जुन परिवारका साथ सुन्दरहरैचा–७ स्थित दिदी सीता रेग्मीको घरमा बस्दै आएका थिए । घर निर्माण भइरहेको कारण उनी र उनको परिवार दिदीको घरमा रहेका थिए । बालिकाका बुवा अर्जुन भने प्रहरीको सम्पर्कमै छन् । सम्पर्कविहीन अवस्थामा रहेकी अस्मिताको खोजी र घटनाबारे थप अनुसन्धान जारी रहेको प्रहरीले जनाएको छ ।
