सुन्दरहरैंचा । मोरङको साजीलाल माध्यमिक विद्यालयले विद्यार्थीहरूलाई व्यवहारिक सिकाई तर्फ जोड दिइरहेको छ । सुन्दरहरैंचा ६ दुलारीमा रहेको सामुदायिक विद्यालयले पढाइका अतिरिक्तका क्रियाकलाप विभिन्न नाराका साथ सञ्चालन गरिरहेको हो ।
विद्यालयले “शिक्षा सँगै श्रम“, “म बनाउँछु मेरो विद्यालय“ लगायतका कार्यक्रमको सुरुवात गरेको शिक्षालाई व्यवहारिक बनाउन जोड दिएको विद्यालयका सूचना अधिकारी भवानी शङ्कर ढकालले बताए । उनका अनुसार विद्यालयले विद्यार्थीका आधारभूत आवस्यक्ता समेत पुरा गर्ने उद्देश्यका साथ शिक्षा सँगै श्रम कार्यक्रम ल्याइएको हो । यसै गरी आफ्नो विद्यालय आफैँ सुन्दर बनाउन म बनाउँछु मेरो विद्यालय कार्यक्रम ल्याइएको उनले बताए ।
‘यसले विद्यार्थीलाई बाहिरी ज्ञान समेत हुन्छ र श्रम गरेर विद्यार्थी रोजगारीमा समेत जोडिन्छन्, ढकाल भन्छन् अन्य कार्यक्रम समेत हामी ल्याउने तयारीमा रहेका छौँ ।’
पहिलो चरणमा तिहारलाई लक्षित सयपत्री फूलको बिरुवा रोप्ने कार्यक्रम र विद्यालय परिसर भित्र रहेको बगैँचामा रङ्ग लगाउने कार्यक्रम गरिएको छ ।
