बाढीपहिरोमा परी कोसी प्रदेशमा मृत्यु हुनेको संख्या ९ पुग्यो

इटहरी । बाढीपहिरोमा परी कोसी प्रदेशमा ९ जनाको मृत्यु भएको छ भने २७ जना वेपत्ता रहेका छन् ।
ताप्लेजुङ ३, पाँचथरमा ३, संखुवासभामा २ र भोजपुरमा १ जना गरी जम्मा ९ जनाको मृत्यु भएको छ ।

संखुवासभाको चैनपुर नगरपालिका–१० निगुरेमा सोमबार साँझ १ जना पुरुषको शव फेला परेको थियो । सुपर हेंवा हाइड्रोपावरबाट बेपत्ता भएका पुरुषको शव सोमबार साँझ मृत अवस्थामा भेटिएको हो ।

उनको पहिचान खुल्न बाँकी रहेको प्रहरीले जनाएको छ । संखुवासभामा हालसम्म २ जनाको मृत्यु भइसकेको जिल्ला प्रहरी कार्यलय संखुवासभाले जानकारी दिएको छ ।

कोसी प्रदेशको आन्तरिक मामिला तथा कानुन मन्त्रालयका अनुसार मृत्यु हुनेमा पाँचथरको फालेलुङ गाउँपालिका–४ की ८ वर्षीया जुना साउदेन, फिदिम नगरपालिका–११ घर भइ माउण्टेन ‘बी’ हाइड्रोमा सेक्युरिटी गार्डको रूपमा कार्यरत २८ वर्षीय हेमराज भनिने संजोग लिम्बू र २५ वर्षीया एलिसा माझीको मृत्यु भएको छ ।

यस्तै, ताप्लेजुङको सिदिङ्वा गाउँपालिका–६ का ३० वर्षीय गणेश तामाङ, मुखुभन्ज्याङका ६७ वर्षीय केशर राई र ३६ वर्षीय सुरेश राईको पनि मृत्यु भएको जिल्ला प्रहरी कार्यलय ताप्लेजुङले जानकारी दिएको छ ।

भोजपुरको टेम्केमैयुङ गाउँपालिका–८ का ३२ वर्षीय मन्दीप राई र संखुवासभाको पाँचखपन नगरपालिका–९ का २६ वर्षीय सन्तोष राईको मृत्यु भएको जिल्ला प्रहरी कार्यलय भोजपुरले जानकारी दिएको छ ।

बाढी र पहिरोमा परेर संखुवासभामा २१, पाँचथरमा ३ र ताप्लेजुङमा ३ जना बेपत्ता भएका छन् । बेपत्ताको खोजी जारी राखिएको कोसी प्रदेश प्रहरी प्रमुख डीआईजी राजेशनाथ बास्तोलाले बताए ।

नेपाली सेनाको टोलीले पहिरोमा फसेकामध्ये पाँचथरबाट १२ र ताप्लेजुङबाट १ जनाको उद्धार गरेको छ । बाढी पहिरोमा परी संखुवासभामा ३, ताप्लेजुङमा २ र पाँचथरमा १ जना घाइते भएका छन् ।

हालसम्म १ सय ६३ परिवार विस्थापित बनेका छन् । ताप्लेजुङमा ८०, पाँचथरमा ६८ र संखुवासभामा १५ परिवार विस्थापित भएको तथ्यांक मन्त्रालयले जानकारी दिएको छ । संखुवासभामा २४, पाँचथरमा १०, ताप्लेजुङमा ६ र इलाममा ३ वटा घर क्षति भएको छ ।

४ जिल्लाका १६ वटा सडक अवरुद्ध बनेका छन् । पाँचथरमा ६, ताप्लेजुङमा ४, इलाम ३ र संखुवासभामा ३ गरी जम्मा १६ वटा सडक अवरुद्ध बनेका हुन् । पाँचथरमा १५, संखुवासभामा ६ र ताप्लेजुङमा २ वटा पुल क्षतिग्रस्त बनेको मन्त्रालयले जनाएको छ । संखुवासभामा ८, पाँचथरमा ३ र ताप्लेजुङमा २ वटा हाइड्रो पावरमा क्षति पुगेको तथ्यांक मन्त्रालयले जनाएको छ ।

प्रतिक्रिया छाड्नुहाेस्

Please enter your comment!
Please enter your name here