ईटहरी – ईटहरी २० तरहरामा ट्रक र मोटरसाइकल एकापसमा ठक्कर दिदा एक युवतीको मृत्यु भएको छ भने एकजना गम्भीर घाइते भएका छन् ।
कोसी प्रदेश ट्राफिक प्रहरी कार्यालय इटहरीका अनुसार गएराति ९ बजेतिर इटहरी २० स्थित तालतलैया मोडमा दक्षिणबाट उत्तरतर्फ जाँदै गरेको ट्रक् र विपरीत दिशाबाट आउँदै गरेको मोटरसाइकल एकापसमा ठोकिएको थियो ।
ट्रक्ले ठक्कर दिदा धरान १५ बस्ने २५ वर्षीया जेनीशा राईको मृत्यु भएको हो । दुर्घटनामा गम्भीर घाइते भएकी उनको उपचारको क्रममा धरानस्थित वीपी कोइराला स्वास्थ्य विज्ञान प्रतिष्ठानमा उपचारका क्रममा मृत्यु भएको प्रहरीले जनाएको छ ।
यस्तै, मोटरसाइकल चालक खोटाङको केपीलाशगढी गाउँपालिका बस्ने २९ वर्षीय निशान राई गम्भीर घाइते भएका छन् ।
उनलाई थप उपचारका लागि बी एण्ड सी अस्पताल बिर्तामोड पठाइएको प्रहरीले जनाएको छ ।
ट्रक चालकको तत्काल नाम, थर, वतन नखुलेपनि प्रहरीले नियन्त्रणमा लिएर घटनाको अनुसन्धान सुरु गरेको छ ।