रामधुनी । सुनसरीको रामधुनी नगरपालिकाले नेपाल तथा छिमेकी राष्ट्रबाट आएका पाहुनाहरुलाई रामधुनी मन्दीरको अवलोकन गराएको छ ।
इटहरीका वरिष्ठ शिक्षासेवी लेखनाथ घिमिरेको अभिनन्दनको अवशरमा सिक्किम, आसाम, कलकता, वाराणसी, कालेबुङ, दार्जिलिङ, सिलिगुडी, मिरिक, दिल्ली र नेपालका विभिन्न जिल्ल्लाबाट आएका पाहुनालाई नगर प्रमुख शंकरलाल चौधरी, उप–प्रमुख तारा थापा, रामधुनी–४ का वडा अध्यक्ष कमल कार्की र रामधुनी मन्दिर व्यपस्थापन समितीका अध्यक्ष डिल्ली कार्कीले स्वागत सहित अवलोकन गराएका हुन् ।
नगरप्रमुख चौधरी र मन्दिर व्यवस्थापन समितीका अध्यक्ष कार्कीले रामधुनी मन्दिरको बारेमा पाहुनाहरुलाई जानकारी गराए ।
पाहुनाहरुको स्वागत कार्यक्रममा सुनसरीकी प्रमुख जिल्ला अधिकारी हुमकला पाण्डे, प्रमुख निर्वाचन आयुक्त दिनेस कुमार थपलिया, सुनसरी प्रहरी प्रमुख लगायतको उपस्थिती रहेको थियो ।
यसअघि गत माघ १२ गते नगरपालिकाले सार्क महासचिव इसाला रुवान विराकुनलाई पनि स्वागत गर्दै मन्दिरको बारेमा जानकारी गराएको थियो ।
नगरपालिकाले रामधुनी मन्दीरको प्रर्वधनका साथै पर्यटकीय स्थलका रुपमा विकाश गर्नका लागि गुरुयोजनाका साथ काम गरिरहेको उपप्रमुख थापाले बताइन् ।
रामधुनी मन्दिरको परिचय
सुनसरी जिल्लाको रामधुनी नगरपालिका र बराहक्षेत्र नगरपालिका अन्तर्गत पर्ने जङ्गलको मध्यक्षेत्रमा रहेको प्रख्यात धार्मिक स्थल हो रामधुनी मन्दिर । यहाँ हरेक रामनवमीको दिन ठूलो मेला लाग्ने गर्दछ । सुनसरी जिल्लाको सदरमुकाम इनरुवाबाट करीब ७ किलोमिटर उत्तरमा रहेको यस स्थानमा चारैतिर घना जङ्गल र सुन्दर फुलबारीका बीचमा धुनीस्थल रहेको छ । त्रेता युगदेखि जल्न शुरु गरेको अखण्ड धुनी आजसम्म निरन्तर बलिरहेको छ ।
किम्बदन्तीमा आधारित यो स्थान पूर्वाञ्चलकै प्रशिद्ध तीर्थस्थल मानिन्छ। राम नवमी, विवाह पञ्चमी र बालाचतुर्दशीमा लाग्ने मेलामा लाखौंको संख्यामा नेपाल, भारत तथा भुटानका मानिसहरू आउने यस पवित्रस्थलमा त्रेतायुगमा रामचन्द्रले बासबस्दा बालेको धुनी निरन्तर आजसम्म जलिरहेको र कथंकदाचित निभेमा धरानस्थित पिण्डेश्वर मन्दिरमा रहेको अखण्ड दीपबाट प्रज्वलित गर्नुपर्ने र पिण्डेश्वर मन्दिरको अखण्डदिप निभेमा रामधुनीको धुनीबाट आगो लगि सल्काउनु पर्ने परम्परा हालसम्म पनि कायमै छ । रामधुनीमा वनबासको क्रममा सम्झना स्वरूप भगवान रामले छोडेको एकजोर खराउ र रथका पाङ्ग्रा हालसम्म अहिले पनि देख्न सकिन्छ ।
किम्बदन्ती अनुसार त्रेतायुगमा भगवान राम वनबास आउने क्रममा धुनी जगाएर एक रात बास बसेको र त्यो स्थान छोडी हिँड्दा आफ्ना पाउका एक जोर खराउ छाडी गएको भन्ने पौराणिक भनाइ छ । भगवान रामको पाउ स्पर्स भएको यस पवित्र भूमिमा आफ्नो ध्यानलाई पूर्ण गर्न बसेका बाबा वनस्खण्डी नाम गरेका योगीले भगवान रामले जगाएका अग्निलाई निभ्न नदिई राखेर त्यसबाट प्राप्त भएको विगुत(खरानी) प्रसादको रूपमा वितरण गर्ने प्रचलन सुरु भएको थियो।
रामधुनी मन्दिरमा गएर पूजाआजा गर्ने र त्यहाँ उत्पादित विगुत लगाएमा चिताएको पूरा हुने जनविश्वास अहिलेसम्म पनि जीवितै रहेको छ ।
रामधुनी मन्दिर सुनसरी जिल्लाको रामधुनी नगरपालिका वार्ड नं. ४ मा पर्दछ। सुनसरीको झुम्का बजारदेखि करिब ७ कि.मी. उत्तर पश्चिममा पर्दछ । रामधुनिमा मुख्य रूपमा धुनि मन्दिर र दरवार मन्दिर रहेका छन्। धुनि मन्दिरमा सधै एउटा साजको मूढो सल्काएर राखिन्छ र उक्त मूढो जली रहेको हुन्छ, जसको खरानी नै त्यहाँको देव प्रसाद मानिन्छ ।
