इटहरी । इटहरीका निजी कलेजका विद्यार्थीहरु विद्यालयले कोरोनाका कारण ढिलो गरी पढाइ सुरु भएपनि एक वर्षको शुल्क लिएको भन्दै सडकमा उत्रिएका छन् ।
उनीहरुले एक सातादेखि दैनिक जसो इटहरीको सडकमा उत्रिएर प्रदर्शन गरिरहेका छन् । आज पनि ठूलो संख्यामा सडकमा उत्रिएका विद्यार्थीहरुले इटहरी चोक केही समय जामसमेत गरेका छन् भने इटहरी उपमहानगरपालिका कार्यालय समेत घेराउ गरे ।
सामुदायिक र सरकारी क्याम्पसका विद्यार्धीको आन्दोलन प्रायः देखिँदै आए पनि इटहरीका निजी कलेजका विद्यार्थीहरु पहिलोपटक आन्दोलित भएका हुन् । उनीहरुले कलेजले लकडाउनको समयको समेत शुल्क मिनाहा नभएसम्म आन्दोलन जारी राख्ने बताएका छन् ।
आन्दोलनरत निजी कलेजका विद्यार्थीलाई सुनसरीका राजनीतिक विद्यार्थी संगठनले पनि साथ दिएका छन् । नेकपा एमालेको विद्यार्थी संगठन अनेरास्ववियु, नेपाली काङ्ग्रेसको नेपाल विद्यार्थी संघ तथा माओवादी केन्द्रको अनेरास्ववियु(क्रान्तिकारी)ले विज्ञप्तिमार्फत समर्थन जनाएका हुन् ।
विद्यार्थीका जायज माग तत्काल पुरा नगरे आन्दोलनमा उत्रिने संगठनले चेतावनी समेत दिएका छन् । नपढाएको समयमा पनि विद्यार्थीबाट शुल्क असुलेर विवादमा आएका इटहरीका निजी कलेजले आफ्ना शिक्षकहरुलाइ भने तलवसमेत नदिएको बताइएको छ ।
गत चैत १ गते एक बिज्ञप्ती निकाल्दै निजी कलेजको छाता संस्था हिसान सुनसरी अध्यक्ष मुकुन्द घिमिरे र सचिव सागर भट्टराईले अनलाइन कक्षा लिएर शुल्क लिएका तर्क गरेका थिए ।
यता इटहरी उपमहानगरपालिले शुल्क मिनाहाको आन्दोलन गरेका विद्यार्थीको माग सम्बोधन गर्ने भन्दै वार्ता सुरु गरेको छ । हिसानका प्रतिनिधि, विद्यार्थी र उपमहानगरका अधिकारीहरू बिच वार्ता सुरु भएको हो ।
उपमहानगरपालिल भने हिजो नै छलफलको लागि पहल गरेको थियो । तर, छलफलमा कुनै सहमति हुन नसकेको बताइएको छ ।
